रोहित शर्माले बनाए नयाँ विश्व किर्तिमान
काठमाडौं । भारतीय ब्याट्सम्यान रोहित शर्माले टेष्ट क्रिकेटमा अर्को कीर्तिमान जोडेका छन् । उनले एकै सिरिजमा सर्बाधिक छक्का हान्ने कीर्तिमान बनाएका हुन् ।
उनले दक्षिण अफ्रिका विरुद्ध राँचीमा तेस्रो तथा अन्तिम टेष्ट क्रिकेट जारी रहँदा यो सिरिजमा अहिलेसम्म १७ छक्का प्रहार गर्दै एकै सिरिजमा सर्वाधिक छक्काको कीर्तिमान बनाएका हुन् ।
एकै सिरिजमा सर्वाधिक छक्काको कीर्तिमान यसअघि वेष्ट इन्डिजका शिमरन हेटमायरको नाममा १५ छक्काको कीर्तिमान रहेको थियो । उनले सन् २०१८–१९ को सिरिजमा बंगलादेश विरुद्ध उक्त कीर्तिमान बनाएका थिए ।
तेस्रो स्थानमा भारतका पूर्व अलराउन्डर हर्भजन सिंह थिए । उनले सन् २०१०–११ मा न्युजिल्याण्ड विरुद्ध १४ छक्का बनाएका थिए ।
शर्माले नटआउट रहँदै ११७ रन बनाएका छन् । रोहितले करियको छैटौं र सिरिजमा तेस्रो शतक बनाएका हुन् । भारतले पहिलो दिन शनिबार ३ विकेटको नोक्सानीमा २२४ रन बनाएको छ ।
मौसमका कारण ५८ ओभरको मात्र खेल भएको थियो । दोस्रो दिन आइतबार रोहितलाई ८३ रनमा खेलिरहेका अजिन्क्या रहानेले सघाउने छन् ।
यसअघिका दुवै खेल जितेर भारतले सिरिज जितिसकेको छ । यो खेल जित्दा क्लिन स्वीप हुनेछ ।
आइसीसी वल्ड टेष्ट च्याम्पियनसिप अन्तर्गतको खेलमा भारत शीर्ष स्थानमा छ । चारतले ४ खेलबाट २०० अंक बटुलेको छ ।
दोस्रो स्थानको न्युजिल्याण्ड र तेस्रो स्थानको श्रीलंकाको २–२ खेलबाट ६०–६० अंक छ ।
चौथो र पाँचौं स्थानका अष्ट्रेलिया र इंगल्याण्डको ५–५ खेलबाट समान ५६–५६ अंक छ ।