एलिजाबेथको स्कटल्यान्ड दरबारमा बहुभाषिक काव्य गोष्ठी

हिमालपोस्ट/काठमाडौँ

पोएट्री ग्रुप एबर्डीन, नेप्लिज हिमालयन एसोसिएसन र बालमोरल दरबार प्रशासनको संयुक्त आयोजनामा शनिवार जेठ ३२ गते एक फरक ढङ्गको कार्यकार्यक्रम सम्पन्न भयो । कार्यक्रम बेलायती महारानी एलिजाबेथको स्कटल्यान्डमा रहेको बालमोरल दरबार परिसरमा सम्पन्न भएको थियो ।

स्कटल्यान्डमा रहेका कवि नवीन क्षेत्री र मुकुल दाहालको संयोजकत्वमा सम्पन्न कार्यक्रमा वालमोरल क्यासलका कर्मचारी ग्लिन जोनस र जोजिया ले सबै सहभागीहरूलाई एक घन्टासम्म प्रकृतिको मनोरम दृश्यावलोकनमा लिएर गएका थिए । दृश्यावलोकन पछि रानीको दरबार अवलोकन र दरवारमा हुने गतिविधिहरूको जानकारीमूलक वृत्तचित्र पनि देखाएका थिए । महारानी एलीजाबेथ प्रत्येक वर्ष तीन महिना विताउने दरबारको परिसरमा काब्य गोष्ठी लगायत साङ्गीतिक कार्यक्रम सम्पन्न भएको थियो ।

खुला आकाशमुनि भएको बहुभाषिक काब्य गोष्ठीमा दरबारका कर्मचारी ग्लिन जोनसले स्कटल्यान्डको स्थानीय गेलिक भाषामा, विशेष अतिथिको रूपमा रहनु भएका पण्डित मधुसूदन भट्टराईले संस्कृतमा, नवीन क्षेत्रीले अङ्ग्रेजीमा, मुकुल दाहाल र राज क्षेत्रीले नेपालीमा कविता वाचन गरेका थिए ।

दरबारको सुन्दर परिसरमा फुलेका फूलहरूको उपस्थितिले शब्दहरूमा ओज थपेको थियो । स्थानीय कलाकारहरू टक थापा, नारायणचन्द्र श्रेष्ठ, रेनुका ढकाल, लव सिम्खडा, उद्धव भट्टराई, पुष्कर गौतम, बलराम ढकाल, प्रतिज्ञा राना, चन्द्रा श्रेष्ठ र अनिता भन्डारीले कार्यक्रममा साङ्गितिक रौनक थपेका थिए । एबर्डीनबाहिर ५० माइलको दूरीमा रहेको दरबारमा सम्पन्न कार्यक्रममा सहभागी हुन उल्लेख्य सङ्ख्यामा कवि कलाकारहरू  लामो यात्रा गरी पुगेका थिए ।