कविता : छोराको गृहकार्य
-बद्री भिखारी
फोटाहरू थिए एल्बममा
केही झिकेछ
केही इतिहासका पानाहरूबाट निकालेछ ।
नभेटिएका केही अनुहारमाथि
स्केच उतारेछ ।
पृथ्वीजस्तै नीलो ‘ड्रइङ पेपर’ मा
जोडेछ, टाँसेछ ।
केही डर, केही सङ्कोच
अव्यक्त खुसी
मनभरि बोकेर बसेको रहेछ ।
ऊ बसेको कोठामा हेरेँ –
यलम्बर
गौतम बुद्ध
विद्यापति
अंशुवर्मा
पृथ्वीनारायण
भानुभक्त
पासाङ ल्हामु
थुप्रैथुप्रै थिए फोटाहरू ।
स्कुलको गृहकार्य नै थाती राखेर
यिनै फोटाहरूबाट
बनाएछ उसले देशको नक्सा !!
(समुद्र साउतीबाट)