मेस्सी-मोड्रिच महाभिडन्त- मिडफिल्ड, डिफेन्स र गोलरक्षकमा क्रोएसिया अब्बल

एजेन्सी- टाइब्रेकरमा उस्तै सनसनीपूर्ण जित । त्यही जित हात पारेको दुई पटकको च्याम्पियन अर्जेन्टिना र साविकको उपविजेता क्रोएसियाले मंगलबार राति फाइनल प्रवेशका लागि प्रतिस्पर्धा गर्दैछ ।

यो खेल लुसेल आइकोनिक रंगशालामा नेपाली समयअनुसार राति १२ः४५ बजे हुनेछ । पहिलो खेलमै साउदी अरेबियासँग २–१ ले स्तब्ध भएपछि मेस्सीकै उच्च प्रदर्शनमा अर्जेन्टिनाले मेक्सिको, पोल्यान्ड, अस्ट्रेलिया र नेदरल्यान्ड्सको चुनौती पन्छाएर सेमिफाइनमा स्थान बनाएको छ ।

यता, समूह चरणमा मोरक्को र बेल्जियमसँग गोलरहित बराबरी खेलेको क्रोएसियाले त्यसपछि क्यानडा, जापान र ब्राजिललाई हराएर अन्तिम चारमा स्थान पक्का गरेको हो ।

क्रोएसिया लगातार दोस्रोपटक फाइनल पुग्ने दाउँमा रहँदा अर्जेन्टिना पनि ८ वर्षपछि फाइनल पुग्ने लक्ष्यमा हुनेछ । यसअघिको दुई संस्करणमा दुवै टोली फाइनलमा पुगेपनि उपाधि भने जित्न सकेको छैन ।

२०१८ मा रुसमा भएको विश्वकपमा क्रोएसिया फ्रान्ससँग ४–२ ले पराजित भएको थियो । त्यसअघि ब्राजिलमा २०१४ मा भएको विश्वकपमा अर्जेन्टिना जर्मनीसँग अतिरिक्त समयमा १–० ले पराजित भएको थियो ।

मिडफिल्डको मास्टर तथा कप्तान लुका मोड्रिच प्रेरित क्रोएसिया अर्जेन्टिनालाई स्तब्ध पार्दै लगातार दोस्रोपटक फाइनल पुग्न चहान्छ । बढ्दो उमेरको बावजुत उनी जुनसुकै बेला पनि खेल परिवर्तन गर्न सक्ने क्षमता राख्दछन् । आक्रमणमा केही कमजोर देखिएको क्रोएसियाको सबैभन्दा बलियो पक्ष टिम गेमसँगै मिडफिल्ड, डिफेन्स र गोलरक्षक नै हो ।

डिनामो जाग्रिवबाट खेलिरहेका २७ वर्षीय गोलरक्षक डोमिनिक लिभाकोभिचले लगातार उच्च प्रदर्शन गरिरहेका छन् । बलियो अग्रपङ्ति रहेको अर्जेन्टिनालाई यिनै गोलरक्षक बाधक बन्न सक्छन् । उनले ब्राजिलविरुद्धको क्वाटरफाइनलमा सम्भावित आधा दर्जन गोल निस्तेज पारेका थिए ।

ब्रुनो पेटकोभिच, माटियो कोभासिच, इभान पेरिसिच, एन्डरेज क्रामारिच, मार्सेलो ब्रोजोभिच, सोसा, लोभरेन, जिभारडिओ र जुरानोभिचले साथ दिनेछन् । क्रोएसियालाई चोट र प्रतिबन्धको समस्या छैन । क्वाटरफाइनलमा बलियो ब्राजिललाई टाइब्रेकरमा पन्छाएको कारण पनि क्रोएसियाको मनोबल उच्च छ ।

यता, सम्भवतः आफ्नो अन्तिम विश्वकप खेलिरहेका कप्तान लियोनेल मेस्सी आफ्नो टोलीलाई फाइनलमा पु¥याउँदै उपाधि जित्ने सम्भावना बलियो पार्न चहान्छ । त्यसका लागि अर्जेन्टिनाले ८ वर्षपछि फाइनल पुग्न क्रोएसियाको बलियो चुनौती तोड्नुपर्ने हुन्छ । सात पटकको बालोन डि ओर जितेका अर्जेन्टिनाका लागि मेस्सी नै मुख्य हतियार हुनेछन् । पाँच खेलमा ४ गोल र २ असिस्ट दिएका उनी गोल्डेन बुटको दौडमा समेत छ ।

मेस्सीलाई जुलियन अल्भारेज, एन्जल डि मारिया, रोड्रिगो डि पउल, मार्क एलिस्टर, इन्जो फर्नान्डेस, लियान्द्रो पारेडेस, नाहुइल मोलिना, निकोलस ओटा मेन्डीले साथ दिनेछन् । गोलरक्षक इमिलियानो मार्टिनेजले यस विश्वकपमा लगातार उच्च प्रदर्शन गरिरहेका छन् । प्रतिबन्धका कारण मार्कस एकुना र गोन्जालो मोन्टिएलले क्रोएसियाविरुद्धको खेल गुमाउनेछ ।

खेल पेनाल्टीमा लम्बिएको अवस्थामा त्यसमा अर्जेन्टिनाभन्दा क्रोएसिया केही भाग्यशाली सावित छ । क्रोएसियाले मुख्य प्रतियोगितामा पछिल्ला ९ मध्ये ८ खेल अतिरिक्त समयसम्म खेल्दै खेल आफ्नो पक्षमा पारेको छ ।

यसमा २००८ को युरोमा टर्की, २०१६ को युरोमा पोर्चुगल, २०१८ को विश्वकपमा डेनमार्क, २०१८ को विश्वकपमै रसिया, २०१८ को विश्वकपमै इंग्ल्यान्ड, २०२० को युरोमा स्पेन, २०२२ को विश्वकपमा जापान र यसमै ब्राजिलविरुद्धको खेल अतिरिक्त र टाइब्रेकरमा लम्बिएको हो । फ्रान्सले मात्रै क्रोएसियालाई ९० मिनेटभित्र हराएको छ । जुन २०१८ को विश्वकपको फाइनल हो ।

यि दुई टोली हालसम्म ५ पटक भिडेका छन् । दुवै टोलीले समान २ जित र १ बराबरीको नतिजा छ । तीन खेल मैत्रीपूर्णमा रहँदा दुई खेल विश्वकपमा छ । विश्वकपमा यि दुई टोलीको यो तेस्रो भेट हुनेछ । सन् १९९८ को विश्वकपमा अर्जेन्टिनाले १–० को जित निकालेको थियो ।

यि दुई टोलीले पछिल्लोपटक २०१८ को विश्वकपमा समूह चरणमा प्रतिस्पर्धा गरेका थिए। जसमा क्रोएसियाले ३–० को सानदार जित निकालेको थियो । त्यसबेला गोल गरेका लुका मोड्रिच मात्रै अहिले क्रोएसियाको टोलीमा छन् । एन्टी रेविच र इभान राकिटिच टोलीमा छैनन् । क्रोएसिया सोही जितलाई निरन्तरता दिने लक्ष्यमा रहँदा अर्जेन्टिना उक्त हारको बदला लिने योजनामा हुनेछन् ।