आरजु राणा र बालकृष्ण खाँणमाथि महेश बस्नेतले लगाए गम्भीर आरोप - Himal Post Himal Post
  • १६ जेष्ठ २०८१, बुधबार
  •      Wed May 29 2024
Logo

आरजु राणा र बालकृष्ण खाँणमाथि महेश बस्नेतले लगाए गम्भीर आरोप



काठमाडौँ । नेकपा एमालेका पोलिटब्यूरो सदस्य तथा पूर्व मन्त्री महेश बस्नेतले काँग्रेस सांसद आरजु राणा देउवा र निवर्तमान गृहमन्त्री बालकृष्ण खाँणमाथि ठुला आयोजनामा अरबौँको चलखेल गरेको गम्भीर आरोप लगाएका छन् ।

आरजु र खाँणहरूले निर्वाचनपछि पनि आफूहरूकै सरकार बन्ने भन्दै ठुला आयोजनाको ठेक्का दिने भनेर अग्रिम रूपमा ६/७ अर्ब रुपैयाँ बुझेको र अहिले सरकारबाट बाहिरिएकोले फिर्ता गर्नुपर्ने अवस्थामा पुगेको बस्नेतको आरोप छ ।

शनिबार रिपोर्टर्स क्लब नेपालले आयोजना गरेको साक्षात्कारमा बोल्दै नेता बस्नेतले देउवा नेतृत्वको यसअघिको सरकारलाई ‘भाउजूको सरकार’ भन्ने मानक रहेको पनि स्मरण गराए ।

उनले भने, ‘देउवा सरकारले विकास निर्माणको पनि केही काम गरेको थिएन । ठुला-ठुला आयोजनाको सन्दर्भमा चाहे त्यो जनसेलको सन्दर्भ होस, चाहे त्यो सूर्य विनायक-धुलिखेल सडकको सन्दर्भ होस्, यी तमाम सन्दर्भमा अरबौँ पैसाको सेटिङ थियो । भाउजूको सरकार अथवा आरजु देउवाज्यू, अथवा बालकृष्ण खाँणजीलगायतका साथीहरूको सेटिङमा अब सरकार बन्नेछ र मिलेमतोमा तपाईँहरूलाई ठेक्कालगायत दिन्छौँ भनेर ६/७ अर्ब उहाँहरूले लिनुभएको छ र अहिले त्यो पैसा चाहिँ फिर्ता गर्नुपर्ने अवस्थामा पुग्नुभएको छ भन्ने कुरा अहिले चर्चामा आएको छ ।’

नेता बस्नेतले यसअघिको देउवा सरकारले मुलुकमा संस्थागत ठगी गरेको गम्भीर आरोप लगाए । उनले भने,‘विशेष गरेर भन्सार भएका जिल्लाहरूमा सिडिओ, एसपीहरू सबै सुरुवाहरू सेटिङमा हुने गर्दथ्यो । भन्सार प्रमुखहरू सेटिङमा हुने गर्दथे । र, वैद्य च्यानलबाट सामानहरू आयात नगरी अवैध च्यानलबाट सामान आयात गर्ने, भन्सार छली गर्ने र राजश्व छली गर्ने काम भएको थियो । एक ढङ्गले भन्ने हो भने राज्य संस्थागत ठगी धन्दामा संलग्न भएको थियो । जसको कारण हाम्रो अर्थतन्त्र टाँट पल्टिएको थियो । पुँजीगत खर्च न्यून भइरहेको छ । आजको अर्थमन्त्रीलाई समेत चुनौती थपिदिएर उहाँहरू जानुभयो ।’

उनले यसअघिको सरकारप्रति व्यङ्ग्य गर्दै ‘मेकिङ आरजु देउवा, नट मेकिडङ नेपाल’ भएको टिप्पणी गरे । बस्नेतले आफूले त्यतिकै यो विषय नउठाएको भन्दै छानबिन गर्न अहिलेको सरकारसमक्ष माग गरेका छन् । उनले भने,‘विगतमा हाम्रोबारेमा पनि प्रश्न उठ्यो । ती सबै विषयमा छानबिन गरियोस् ।’