सिमा विवाद छाडेर प्रदीप ज्ञवाली विदेश सयर, नियत के ?
काठमाडौँ । भर्खरै भारतले जारी गरेको नयाँ नक्सामा नेपाली भूभाग समेटेपछि देशभर जनस्तरबाट बिरोध भैरहेको छ। तर, भारतसँगको सिमा विवाद समाधान गर्न छाडेर परराष्ट्रमन्त्री प्रदीपकुमार ज्ञवाली रुस भ्रमणमा गएका छन् ।
सीमा विवादको समाधान गर्न छाडेर विदेश भ्रमणमा गएको भन्दै ज्ञवालीको चर्को आलोचना भएको छ । औपचारिक भ्रमणका निम्ति उनि हिजो अपराह्न रुसी महासङ्घको राजधानी मस्कोतर्फ प्रस्थान गरेपछि उनको ब्यापक आलोचना भएको हो ।
ज्ञवाली नेतृत्वको नेपाली टोलीले एक हप्ता लामो भ्रमणका क्रममा सर्वियाको पनि भ्रमण गर्ने परराष्ट्र मन्त्रालयले जनाएको छ । उनका साथ परराष्ट्रसचिव शङ्करदास वैरागी र परराष्ट्र मन्त्रालयका उच्च अधिकारी सहभागी छन् ।
नयाँ सिमाना सहितको नक्शा भारतले सार्वजनिक गरेपछि जनस्तरबाट चर्को विरोध भइरहेपनि सरकारले प्रभावकारी र ठोस कदम चाल्न नसकिरहेका बेला परराष्ट्रमन्त्री ज्ञवाली एक हप्ता लामो विदेश भ्रमणमा निस्कनु राम्रो नभएको चर्चा चलिरहेको छ ।
कुटनीतिक पहल गरेर विवाद समाधान गर्ने मुख्य जिम्मेबारी भएका मन्त्री नै एक हप्तासम्म विदेशतिर गएपछि तत्काल विवाद समाधान नहुने देखिएको छ ।
भारतको नयाँ नक्शाका विरुद्धमा स्पष्ट अडानका साथ सरकार उभिन नसकिरहेको बेला मन्त्री ज्ञवाली सचिवसहित विदेश भ्रमणमा जानुलाई विरोधमा उत्रिएका नेपालीलाई थकाउने रणनीतिका रुपमा पनि लिइएको छ ।
विपक्षमा रहदाँ राष्ट्रवादका नाममा चर्को भाषण गरेपनि अहिले भने भारत सामू निरिह भएकाले यसलाई छल्न र आम नागरिकको दवाव नसुनेझै गर्न मन्त्री र सचिव विदेश भ्रमणमा गएको कुटनीतिक क्षेत्रका विज्ञहरुको टिप्पणी छ ।