टी-२० वर्ल्डकप छनोट : सन्दिप चम्किएपछि मलेसिया १०० रनमा अलआउट

काठमाडौँ  ।  टी-२० वर्ल्डकप क्वालिफायर एसिया रिजनको समूह बी मा आज स्पीनर सन्दीप लामिछाने चम्किएपछि नेपालले मलेसियालाई १०० रनमा अलआउट गरेको छ । सन्दिपले उत्कृष्ट बलिङ गर्दै ५ विकेट लिएपछि  मलेसियाले नेपाललाई १०१ रनको लक्ष्य दिएको हो ।

क्वालालम्पुरस्थित बायुमास ओभलमा टस जितेर पहिले ब्याटिङ गरेको मलेसियाले १९.३ ओभरमा सबै विकेट गुमाएर सय रन बनाएको छ । मलेसियाका लागि विकेटकिपर ब्याट्सम्यान सफिक सरिफले सर्वाधिक ४९ रन बनाए । नेपालका लागि सन्दीपले ४ ओभरमा २० रन खर्चेर ५ विकेट लिए।

मलेसियाले राम्रो सुरुवात गर्दै पहिलो विकेटको लागि ३० रनको साझेदारी गरेपनि सन्दीपले सैइद अजिज र सफिक सरिफको साझेदारी तोडेका थिए। उनले पाँचौ ओभरमा अजिजलाई १३ रनमा आउट गर्दै नेपाललाई पहिलो विकेट दिलाएका थिए।

सन्दीपले सर्वाधिक ४९ रन बनाएका सरिफसहित सुहान अलागारतनम (५) भिरनदिप सिंह र स्याज्रुल इद्रुस (0) को विकेट लिए ।

यस्तै नेपालका सोमपाल कामीले ३.३ ओभरमा १६ रन खर्चेर ३ विकेट लिए भने कप्तान पारसले १ विकेट लिए ।अहिले नेपालले १०१ रनको लक्ष्य पछ्याउँदै जवाफी ब्याटिङ गर्दै छ ।