बुटवलका तीन विद्यार्थी बेपत्ता- अज्ञातस्थल भन्दै म्यासेज आयो

रुपन्देही- बुटवलमा शुक्रबार तीन जना विद्यार्थी एकाएक सम्पर्कबिहिन बनेका छन् । बुटवल उपमहानगरपालिका वडा नं ११ दुर्गानगरका तीन जना विद्यार्थी सम्पक्रबिहीं बनेका हुन् ।

बिहान विद्यालय हिंडेका तीन विद्यार्थी वेपत्ता भएपछि दुर्गानगरमा सन्नाटा छाएको छ ।सम्पर्कबिहिन हुनेमा दुर्गानगरका १५ वर्षीय सागर पौडेल र समिर लम्साल तथा १४ वर्षका प्रदीप पन्थी हुन् ।

उनीहरू शुक्रबार विहान विद्यालय हिंडेपछि विद्यालयमा पनि हाजिर नभएको र घरमा पनि नफर्केको जनाइएको छ ।

नहरपुर मावि कक्षा ८ मा पढ्ने १ जना र नबिन औद्योगिक मावि कक्षा ९ मा पढ्ने दुई जनासँगै घरबाट निस्केका तर न विद्यालय पुगे न घर फर्किए । सम्पर्कबिहीन भएपछि परिवारले प्रहरीमा खबर गरेपछि उनीहरूको खोजी कार्य भैरहेको बताइएको छ ।

इलाका प्रहरी कार्यालय बुटवलका अनुसार परिवारको निवेदन अनुसार सबैतिर खोजविन भैरहेको छ । प्रहरीले अभिभावक र विद्यालय प्रशासन सबैलाई सचेत रहन आग्रह गरेको छ ।

वेपत्तामध्ये एक विद्यार्थीले शुक्रबार घरमा म्यासेज गरेको समेत खुलेको छ । उनले शनिबार दिउसो २ बजे आफन्तलाई फेसबुक म्यासेनजरमा खबर पठाउँदै आफूहरूलाई अचेत बनिएको र अज्ञातस्थलमा राखिएको बताएका थिए । त्यसपछि कुनै सम्पर्क नभएको जनाइएको छ ।