सिन्धुपाल्चोकमा एमाले र माओवादीले गठबन्धन गरेर चुनाव लड्ने

काठमाडौं– सिन्धुपाल्चोकको जिल्ला समन्वय समितिको निर्वाचनमा एमाले र माओवादी केन्द्रले संयुक्त उम्मेदवारी दिने भएका छन्। त्यहाँ जेठ २९ गते निर्वाचन हुँदैछ।

‘जिल्ला समन्वय समितिको निर्वाचनमा शक्तिशाली वामपन्थी पार्टीहरु नेकपा एमाले र नेकपा माओवादी केन्द्रबीच तुनावी तालमेल गरी संयुक्त उम्मेदवारी दिने निर्णय गरेका छौं’, सिन्धुपाल्चोकको माओवादी केन्द्रको जिल्ला समन्वय समिति र एमालेको जिल्ला कमिटीद्वारा जारी संयुक्त विज्ञप्तिमा भनिएको छ।

विज्ञप्तिमा सम्पूर्ण जिल्ला सभा सदस्यहरुलाई मतदान प्रक्रियामा सक्रियतापूर्वक सहभागी भई तोकिएका गठबन्धन उम्मेदवारहरूलाई विजयी बनाउन भनिएको छ।