रवीन्द्र अधिकारी सवार हेलिकोप्टर दुर्घटनाको रहस्य खुल्यो
काठमाडौं ।तत्कालीन संस्कृति, पर्यटन तथा नागरिक उड्डयनमन्त्री रवीन्द्र अधिकारीसहित सात जना सवार हेलिकोप्टर दुर्घटनामा खराब मौसमलाई नै मुख्य कारण ठहर गरिएको छ । सो दुर्घटनामा मन्त्री अधिकारीसहित सबै जनाको ज्यान गएको थियो ।
गत १५ फागुनमा ताप्लेजुङको पाथीभराबाट काठमाडौंका लागि उड्ने क्रममा एयर डाइनेस्टीको ‘९एन–एएमआई–एसएस ३५० बी ३ इ’ हेलिकोप्टर दुर्घटनामा परेको थियो । दुर्घटनापछि सरकारद्वारा गठित छानबिन आयोगले बुधबार संस्कृति, पर्यटन तथा नागरिक उड्डयन राज्यमन्त्री धनबहादुर बुढासमक्ष प्रारम्भिक प्रतिवेदन बुझाएको हो । सो प्रतिवेदनमा हेलिकोप्टर दुर्घटनाको मुख्य कारण खराब मौसम नै मानिएको छ । त्यसदिन पाथीभरा क्षेत्रको मौसम राम्रो थिएन ।
प्रतिवेदनअनुसार मन्त्री सवार हेलिकोप्टर पाथीभरामा ओर्लिएपछि मौसम झनै बिग्रियो । त्यहीबीच केही समय मौसम खुलेपछि यही मौकामा उडिहालौं, फेरि मौसम बिग्रन सक्छ भन्ने कुरा भयो, त्यसपछि पाइलटले हेलिकोप्टर उडाए । हेलिकोप्टर उडेको एक मिनेटभित्रै पुनः हिउँसहितको हिमाली आँधी आयो । हेलिकोप्टर मोडिने समयमै अकस्मात आएको आँधीमा पर्दा पाइलटले सम्हाल्ने मेसो नै पाएनन् र हेलिकोप्टर दुर्घटनामा परेको उल्लेख छ । यस दुर्घटनालाई छानबिन आयोगले ‘एक दुर्भाग्य’ भनेको छ ।
यस प्रतिवेदनमा मौसमबाहेक सो दुर्घटनामा मानवीय दबाब भने नदेखिएको मन्त्रालय स्रोतले जनाएको छ । छानबिन आयोगको टोलीलाई मौसमका कारण छिटो सुरक्षित स्थानमा फर्कने दबाब थियो तर उच्चपदस्थ अधिकारी कसैबाट पनि चालकलाई विमान उडाउन दबाब नदिइएको आयोगको निष्कर्ष छ । त्यस दिन मौसम निरन्तर बिग्रेका कारण उड्न नसके पाथीभरामै बास बस्नुपर्ने अवस्था आउने भएकाले टोली दबाबमा भने थियो ।