कांग्रेससँग किन फायर भए प्रेम आले ?
काठमाडौं : नेकपा (एकीकृत समाजवादी)का नेता प्रेम आलेले सत्ता गठबन्धनको प्रमुख घटक कांग्रेसको भूमिकाप्रति असन्तुष्टि जनाएका छन्।
नेता आलेको निर्वाचन क्षेत्र डोटीमा कांग्रेसले गठबन्धन गर्न नखोजेको भन्दै उनले असन्तुष्टि जनाएका हुन्।
पार्टीको समाजवादी मगर संघको राष्ट्रिय भेलालाई सम्बोधन गर्दै उनले भने, ‘मेरो जिल्लामा पनि कांग्रेसले ठाउँ ठाउँमा भेला गर्ने, हामीलाई गठबन्धन चाहिँदैन भन्ने कुरा गरिरहेका छन्। गठबन्धन चाहिएन भने नगर्ने हो भने डोटीमा मात्र होइन ७७ जिल्लामै नगर्ने भन्नुपर्छ। होइन भने ७७ जिल्लामै गठबन्धन हुनुपर्छ।’
विद्रोहबाट जनताकोमा भर्खरै आएको पार्टी भएकाले आफूहरूलाई हेप्न खोजेको उनको भनाइ छ।
‘९ वटा स्थानीय तह भएको डोटीमा ६५ वडा छन्। त्यसमध्ये १० वडामा मात्र हाम्रा उम्मेदवारी भयो। त्यसमा ५५ वडामा हामीले त्यतिकै छाडेका थियौं। त्यही १० वडाको भोट गनेर कांग्रेसले समाजवादीको ३ हजार भोट छ भन्ने कुरा मान्य हुँदैन’ उनले भने।
स्थानीय चुनावको आधारमा गठबन्धन गर्ने कुरा स्वीकार्य नहुने चेतावनी दिए।
‘चुनावअघि काठमाडौंमा बालेनको मत कति थियो? उहाँ निर्वाचित हुनुभयो। स्थानीय निर्वाचनलाई आधारमा मानेर विद्रोहको कुरा गरिरहेका छन्। त्यसमा हाम्रो ध्यानाकर्षण भएको छ। मैले पार्टी बैठकमा पनि भनिसकेको छु’ उनको भनाइ छ।