प्रधानमन्त्री ओलीले शेयर किनेर ‘जनताको जलविद्युत’ कार्यक्रमको शुभारम्भ
काठमाडौं– प्रधानमन्त्री केपी शर्मा ओलीले माथिल्लो त्रिशुली–३ को शेयर खरिद गरि ‘जनताको जलविद्युत’ कार्यक्रमको शुभारम्भ गरेका छन् ।
विहीवार प्रधानमन्त्री निवास बालुवाटारमा प्रधानमन्त्री ओलीले त्रिशूली जलविद्युत कम्पनी लिमिटेडले नुवाकोटमा निर्माण गरिरहेको ३७ मेगावाटको माथिल्लो त्रिशूली–३ बी आयोजनाका लागि शेयर खरिद गरेका हुन् ।
शेयर भर्नका लागि प्रधानमन्त्री ओलीले ग्लोबल आइएमई र नेपाल डिपी लिमिटेडमा डिम्याट खाता खोलेका थिए ।
उर्जामन्त्री वर्षमान पुनले पनि शेयर खरिद गरेका छन् । प्रधानमन्त्री ओलीले र उर्जामन्त्री पुनले १ हजार/ १ हजार कित्ता शेयर खरिद गरेका छन् । ‘जनताको जलविद्युत कार्यक्रम’ अन्तर्गतको आयोजनामा लगानी गर्न गत शुक्रबार (चैत १ गते) आवेदन दिन आह्वान गरिएको थियो ।
बिहीबारबाट निष्कासन गरेको शेयर छिटोमा चैत १२ गते र ढिलोमा २०७६ बैशाख ६ गते बन्द हुनेछ ।
कम्पनीले सर्वसाधारणका लागि ३५ लाख ९३ हजार ८ सय ५० कित्ता शेयर निष्कासन गरेको छ । हाल यसको १० प्रतिशत अर्थात् ३ करोड ७० लाख ५० हजार रुपैयाँ ९३ लाख ७० हजार ५ सय कित्ता को लागि मात्र सेयर माग गरिएको छ ।
सय रुपैयाँ मूल्य अंकित उक्त परिमाणको सेयर किन्न हाल १० प्रतिशतले हुन आउने प्रतिसेयर १० रुपैयाँमा आवेदन दिन पाइनेछ । व्यक्तिले किन्न चाहेको बाँकी सेयरबापतको रकम कम्पनीले आयोजनाको निर्माण ५० प्रतिशत पूरा भएपछि माग गर्ने जनाएको छ ।
कम्पनीले जारी पुँजी २ अर्ब ४७ करोड रुपैयाँको १५ प्रतिशत अर्थात् ३७ करोड ५ लाख रुपैयाँको ३७ लाख ५ हजार कित्ता सेयर सर्वसाधारणका लागि छुट्ट्याएको छ । यसमध्ये ३ प्रतिशत सेयर ९१ लाख ११ हजार १ सय ५० कित्ता० कम्पनीका कर्मचारीलाई सुरक्षित राखी बाँकी निष्कासन गरेको जनाएको छ ।