ओलीले भने- एमालेको संगत गरेपनि जितिन्छ भन्ने हुनुपर्छ

नेकपा एमालेका अध्यक्ष केपी शर्मा ओलीले जसपाका नेता अशोक राईका लागि मत माग्दै एमालेकाे संगत गर्दा पनि जितिन्छ भन्ने कुरा पुष्टि गर्नुपर्ने बताएका छन् ।

धरानमा आयोजित चुनावीसभालाई सम्बोधन गर्दै उनले कुनै बेला आफ्नो उपाध्यक्ष रहेको सम्झिँदै अशोकलाई चुनावी तालमेलको आधारमा भोट दिन आह्वान गरे ।

जसपाका वरिस्ठ नेता राईलाई भोट माग्दै ओलीले ब्यङ्ग्यात्मक शैलीमा एमाले नरहे पनि एमालेको संगत गरेकाले भोट दिएर जिताउन आह्वान गरे ।

‘जसपाका अशोक राई भन्दा कसोकसो लाग्छ मलाई, यति वर्ष संगत गरियो । उहाँ माननीय, मन्त्री, उपाध्यक्ष सबै एमालेमा हुँदा हुनुहुन्थ्यो’, ओलीले भने, ‘अहिले एमालेमा हुनुहुन्न । तर, एमाले नहुँदा पनि एमालेको संगत गर्दा पनि जितिन्छ भन्ने पुष्टि गर्नु छ हामीले ।’

राई अहिले एमालेकै समर्थनमा सुनसरी–१ बाट चुनाव लड्दैछन् । एकल जातिय पहिचानसहितको प्रदेशको पक्षमा वकालत गर्दै २०६९ सालमा राईसँगै राजेन्द्र श्रेष्ठ, विजय सुब्बा, रकम चेम्जोङलगायतका नेताहरूले एमाले छाडेका थिए ।