दशैँ बिशेष कार्यक्रम गर्दै एनआरएन साउथ अस्ट्रेलिया

साउथ अस्ट्रेलिया।

गैर आवासीय नेपाली संघ (एनआरएनए) साउथ अस्ट्रेलियाले दशैं टिका ग्रहण कार्यक्रम आयोजना गर्ने भएको छ। बडा दशैं कै दिन जमरा वितरण र टिका कार्यक्रम आयोजना गर्न लागेको एनआरएन साउथ अस्ट्रेलिया कि सचिब डोल्कर गुरुङले बताईन। बिशेष गरि बिद्यार्थी , नवआगन्तुकहरु सबैले दशैंमा मान्यजन बाट टिका लगाउने अवसर पाउन भनेर कार्यक्रम आयोजना गरिएको गुरुङले जानकारी दिईन ।

कार्यक्रमको बारेमा थप जानकारी दिदै एनआरएन साउथ अस्ट्रेलिया कि उपाध्यक्ष सन्तोषी गौतम भन्छिन ” जब नेपालमा चाडपर्वहरुको रौनक आउने गर्छ यता प्रदेशमा हुने मनहरुलाई न्यास्रो लाग्ने गर्छ त्यस माथि भर्खरै आउनु भएका बिद्यार्थी भाई-बहिनिहरु र नव आगन्तुक साथीहरु वा जसले मान्यजन बाट टीका लगाउन पाउदैन उहाहरुलाई खल्लो लाग्ने गर्छ , त्यसैले त्यहिँ खल्लो र न्यास्रोपन मेट्न भए पनि हामीले सानो प्रयास स्वरुप दशैं टिका ग्रहण कार्यक्रम आयोजना गर्दैछौ।

कार्यक्रम बिहान ९ बजे देखि बेलुका सम्मै गणेश मन्दिरमा चल्ने गौतमले जानकारी दिईन। ९ बजे देखि १० बजे सम्म सबैको सहजताको लागी जमरा वितरण गरिने र टिका ग्रहण कार्यक्रम दिउस भरि नै चल्ने आयोजकले बताए। कार्यक्रममा नेपाल बाट आउनु भएका आमा बुवाहरु र मान्यजन बाट टिका ग्रहणको कार्यक्रम राखिएको छ। कार्यक्रममा सबै नेपालीहरुलाई उपस्थित भएर सामुहिक रुपमा दशैं टिका लगाउन एनआरएनले आवहान गरेको छ।