कांग्रेसको २० प्रतिशत मत घट्यो, एमाले र माओवादीको कति ?
काठमाडौं – मङ्सिर ४ मा सम्पन्न निर्वाचनको अन्तिम परिणाम घोषणा नभए पनि मत भने गणना गरेर सकिएको छ । प्रतिनिधिसभा तथा प्रदेशसभा सदस्य निर्वाचनअन्तर्गत प्रतिनिधिसभा सदस्यको समानुपातिक प्रणालीतर्फको मतगणना सकिएको छ ।
यो पटकको निर्वाचनमा केहि फरक नतिजा आएको छ । जसमा ठूला पार्टीका मतदाता घटेको देखिएको छ । निर्वाचनमा नेपालका तीन वटै ठूला दल नेकपा (एमाले), नेपाली कांग्रेस र नेकपा (माओवादी केन्द्र)को समानुपातिकतर्फ अघिल्लो पटकको तुलनामा घटेको छ ।
समानुपातिकतर्फ एमालेले २८ लाख ४५ हजार ६४१ मत ल्याएको छ । यो अघिल्लो निर्वाचनको तुलनामा एमालेको झण्डै ६ लाख कम मत हो । पाँच वर्षअघि एमालेले ३४ लाख ३८ हजार मत ल्याएको थियो ।
यस्तै नेपाली कांग्रेसले पाँच वर्षअघि ३४ लाख १४ हजार मत ल्याएकोमा यसपालि २७ लाख १५ हजार २२५ मत ल्याएको छ । यो विवरण अनुसार नेपाली कांग्रेसका करिव ७ लाख मतदाता घटेको देखिन्छ । माओवादी
ले केन्द्रले यसपालि ११ लाख ७५ हजार ६८४मत ल्याएको छ । पाँच वर्षअघि माओवादीले समानुपातिकतर्फ १४ लाख २२ हजार मत ल्याएको थियो । यो निर्वाचनमा माओवादीको भने करिव साढे २ लाख मत घटेको देखिन्छ ।
ठूला पार्टीको मत घट्दा नयाँ पार्टीले उल्लेख्य मत ल्याएका छन् । राष्ट्रिय स्वतन्त्र पार्टीको ११ लाख ३० हजार ३४४, राप्रपाको पाँच लाख ८८ हजार ८४९, जसपाको चार लाख २१ हजार ३१३ र जनमत पार्टीको तीन लाख ९४ हजार ६५५ मत आएको छ ।
त्यस्तै, एकीकृत समाजवादीले दुई लाख ९८ हजार ३९१ मत र नागरिक उन्मुक्ति पार्टीले दुई लाख ७१ हजार ७२२ मत ल्याएका छन् भने लोकतान्त्रिक समाजवादी पार्टी (लोसपा) एक लाख ६७ हजार ३६७ मत पाएका छन् । अरू पार्टीले एक लाखभन्दा कम मत पाएका छन् ।
यो निर्वाचनबाट नेकपा एमाले, नेपाली कांग्रेस, नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी र जनमत पार्टीले राष्ट्रिय दल बनेका छन् ।