फोर्ब्सको सुचीमा नेपाली महिला आयुषी र कञ्चन !
फोर्ब्स म्यागेजिनले प्रकाशित गरेको एशियाका ‘३० मुनिका ३०’ अर्थात ३० वर्षभन्दा कम उमेरका ३० जना प्रभावशाली एशियालीको सुचीमा नेपालका दुई जना महिला छानिएका छन् ।
फोर्ब्सले हरेक वर्ष कला, प्रविधि, उपभोक्ता, व्यवसाय, विज्ञान, इकमर्श, सामाजिक उद्यमशिलता लगायतका विभिन्न १० विधामा उत्कृष्ट कार्य गरेका ३० वर्ष भन्दा कम उमेरका ३० जना सफल तथा प्रभावशाली व्यक्तिहरुलाई सुचीमा समावेश गर्दै आएको छ ।
सामाजिक उद्यमीतर्फ नेपालबाट आयुषी केसी र कञ्चन अमात्यलाई फोर्ब्सले छानेको हो ।
यस सुचीमा समावेश हुनेहरुलाई फोर्ब्सले आउँदो जुलाईमा हङकङमा आयोजना गर्ने अन्तराष्ट्रिय सम्मेलनमा सहभागिताको अवसर प्रदान गर्नेछ ।
विश्वभरीका लगानीकर्ता तथा सोही क्षेत्रमा क्रियाशिल संस्था तथा व्यक्तिहरुको सहभागिता रहने उक्त सम्मेलनमा सुचीकृत हुनेले नेटवर्किङ तथा लगानी जुटाउने अवसरका साथै एक अर्काका अनुभव साटासाट गर्न पाउनेछन् ।
केसी फोहोर व्यवस्थापन गर्दै आएको ‘खालीसीसी डटकम’की संस्थापक हुन् भने अमात्य ‘दिगो मत्स्य खेती अभियान’ (एसएफएफआई) नामक संस्थाकी अभियान्ता तथा उद्यमी हुन् ।
खालीसीसी डटकमले खालीसीसी संकलकमार्फत पुनप्रयोग गर्न मिल्ने फोहोरको व्यवस्थापनमा उल्लेख्य योग्दान दिएबापत केसीलाई सो सम्मान दिएको फोर्ब्सले जनाएको छ ।
केसीको यस संस्थाले काठमाण्डुका घर, संस्था, होटल, रेष्टुरेन्ट लगायतबाट दैनिक निस्किने नकुहिने फोहोरलाई पुनःप्रयोगमा ल्याउन उल्लेख्य योग्दान दिएको तथा ‘रिसाइक्लिङ’ को महत्व र फोहोर संकलकप्रतिको मानिसको बुझाई परिवर्तन गर्न क्रियाशिल रहेको भन्दै सुचीमा सुचिकृत गरिएको जनाएको छ ।