माओवादी र कांग्रेसमाथि खनिए मेटमणि, गरे गठबन्धन तोड्ने संकेत

काठमाडौं- नेकपा(एकीकृत समाजवादी) का सांसद मेटमणि चौधरीले पाँच दलीय गठबन्धनमा इमान्दारिता नदेखिएको बताएका छन् ।

बिहीवार प्रतिनिधि सभा बैठकमा सहभागी हुन संसद भवन पुगेका सांसद चौधरीले सञ्चारकर्मीहरुसँग कुराकानी गर्दै गठबन्धनमा इमान्दारिता नदेखिएको बताए । उनले नेपाली कांग्रेसले जवाफदेहिता र इमान्दारिता देखाउन नसकेकको बताए ।

माओवादी पार्टी व्यापारिक मानिसले जस्तै फाइदा हुनेतिर मात्रै ढल्किएको उनको आरोप छ । निर्वाचन मत परिणामबाट आफूहरु सन्तुष्ट हुन नसकेको पनि उनले बताए ।

‘चुनावी मत परिणाममा हामी सन्तुष्ट छैनौँ । जुन तरिकाले पाँच दलीय गठबन्धनमा इमान्दारिता हुनुपर्थ्याे, त्यस्तो देखिएन । नेपाली कांग्रेसले जुन तरिकाको जवाफदेहिता, इमान्दारिता देखाउनुपर्थ्याे त्यो देखाउन सकेन’ उनले भने, ‘माओवादी पार्टीले आफू एउटा बिजनेश म्यानको जस्तै चार पैसा फाइदा कता हुन्छ, उतैतिर ढल्किने यहाँसम्मकी कुनै ठाउँमा एमालेसँग समेत समन्वय गर्‍यो । कांग्रेसले पनि त्यो खालको व्यवहार गर्‍यो । त्यसैले हामिले जुन खालको रिजेल्ट अपेक्षा गरेका थियौँ त्यो खालको रिजेल्ट आउन सकेन ।’

उनले कांग्रेस र माओवादी सच्चिएमा मात्र गठबन्धनलाई अगाडि बढाउन सकिने बताए । नैतिकताको राजनीति नगर्ने र भनेको कुरा नगर्ने पार्टीहरुसँग अगाडि जान नसकिने उनले बताए ।

उनले याे पालिका चुनावमा नेपाली कांग्रेस र नेकपा(माओवादी केन्द्र)का बीचमा मात्रै गठबन्धन भएको जिकिर गरे । पाँच दलीय गठबन्धनलाई सफल भएको मान्न नसकिने उनले बताए ।