ला लिगामा बार्सिलोना विजयी, मेस्सीको व्यक्तिगत ५० गोल
काठमाडौं- स्पेनीस लिग फुटबलमा शिर्ष स्थानको बार्सिलोनाले डेपोर्टिभो आलाभेजलाई ४–१ ले हराएको छ ।
गए राति आफ्नै मैदानमा भएको खेलमा बार्सालाई विजयी गराउन एन्टोइन ग्रिजम्यान, अर्टुरो भिडाल, लियोनल मेस्सी र लुईस सुवारेजले एक एक गोल गरे ।
लियोनल मेसीले सन् २०१९ को आफ्नो व्यक्तिगत ५० औं गोल गर्दै स्पेनी ला लिगामा बार्सिलोनालाई एलाभेसमाथि शनिबार राति ४–१ को जित दिलाएका हुन् ।
यस नतिजासँग बार्सिलोनाले घरमा पूरा वर्ष अपराजित यात्रा पूरा गरेको छ ।
बार्सिलोनाले सन् २०१९ मा आफ्नो घरेलु मैदान नू क्याम्पमा २४ खेल जितेको छ भने चार खेलमा बराबरी खेलेको छ। सन् २०११ यता यो पहिलो पल्ट बार्सिलोना घरमा अपराजित रहेको हो।
जितपछि बार्सीलोनाले दोस्रो स्थानको रियाल मड्रिडसँग ३ अंकको अग्रता लिएको छ । १८ खेलबाट बार्सिलोनाको ३९ अंक भएको छ भने १७ खेलबाट रियाल मड्रिडको ३६ अंक छ ।
रियालले आज एथ्लेटिक बिल्बाओसँग खेल्नेछ । ला लिगाअन्तर्गत गए रातिका अन्य खेलहरुमा सेभियाले मयोर्कालाई २–० ले हराउँदा भियारियालले गेटाफेमाथि १–० को जित निकाल्यो ।
भ्यालेन्सीया र रियाल भालाडोलिडले एक एक गोलको बराबरी खेलेका छन् ।