एकीकृत समाजवादी गुल्मीको अध्यक्षमा पुरानै नेता फर्किए

नेकपा (एकीकृत समाजवादी)को गुल्मी जिल्ला अध्यक्षमा पुनः संस्थापक अध्यक्ष श्रीराम महत नै चयन भएका छन् । शनिबारको बैठकबाट उनलाई अध्यक्षमा सर्वसम्मत चयन गरिएको हो ।

महत बुटवल आएका बेला अध्यक्ष बनाइएका नरेश भण्डारी केही दिनअघि नेकपा (एमाले)मै फर्किएका थिए ।

शनिबार सदरमुकाम तम्घासमा बसेको सो पार्टीको विस्तारित बैठकबाट महतलाई नै अध्यक्षमा चयन गरिएको जनाइएको छ । उनले एकीकृत समाजवादीलाई एक ढिक्का बनाएर अगाडि बढ्ने प्रतिबद्धता जनाए ।

वामदेव गौतम नेतृत्वको नेकपा एकता अभियानका केन्द्रीय सदस्य प्रमेश पोखरेललाई एकीकृत समाजवादीको गुल्मी इन्चार्जको जिम्मेवारी दिनका लागि केन्द्रमा सिफारिस गरिएको जनाइएको छ । सहइन्र्चाजमा गणेश विश्वकर्मा नै कायम छन् ।