काठमाडौँमा पनि हावाहुरी, वर्षा र मेघ गर्जन
काठमाडौँ – काठमाडौँ उपत्यकामा हावाहुरी चल्न सुरु भएको छ । बंगालको खाडीबाट सुरु भएको चक्रवात फानीको प्रभावले काठमाडौँ उपत्यकासहित आसपासका क्षेत्रमा पनि हावाहुरी चल्न सुरु भएको हो ।
हावाहुरीका कारण काठमाडौँको सडकमा सवारीका साधनहरु पातलीएका छन् । मानिसहरुलाई घरबाहिर निस्कन समस्या भएको छ ।
जल तथा मौसम पूर्वानुमान महाशाखाले नेपालको पूर्वी तथा मध्य क्षेत्रमा आज (शुक्रबार) र भोलि (शनिबार) पनि चक्रवातको प्रभाव रहने जनाएको छ ।
मौसमविद विभूति पोखरेलले चक्रवातको प्रभावका कारण हुरिबतास चल्ने र मेघ गर्जनसहित पानी पर्ने सम्भावना रहेको बताइन् ।
उनले हिमाली भेगमा भारी हिमपात हुने बताइन् । भारी हिमपात हुने भएकोले हिमाली भेगमा गएका पर्वतारोहीलाई सुरक्षित स्थानमा रहन र दुई दिन हिमाली क्षेत्रमा हेलिकप्टर नउडाउन सरकारले अनुरोध गरेको छ।