डा. शेखर कोइरालाले गरे नेकपाको यस्तो भविष्यबाणी

नेपाली कांग्रेसका केन्द्रिय सदस्य डा. शेखर कोइरालाले सत्तारुढ नेकपाले सिजिङ पिङ विचारधारा स्विकारे नेकपा आफै सकिने भविष्यबाणी गरेका छन् । नेकपाको यो कदमले नेकपा सकिने मात्र नभई मुलुक नै धरापमा पर्ने उनको दाबी छ ।

नेपाली कांग्रेस निकट प्रजातन्त्र सेनानी संघ सिन्धुपाल्चोकको अधिवेशनलार्ई चौतारामा उद्घाटन गर्दै कोइरालाले नेकपाले सिजिङ पिङ विचारधारा नेकपा र मुलुक दुबैका लागी हितकर नहुने दाबी गरेका हुन् । नेकपाले सि जिङ पिङबाट भ्रष्टाचार नियन्त्रणका विषयमा सिक्नु ठिकै भएपनि विचारधारा नै अंगाल्न खोज्नु गलत हुने उनको भनाई थियो ।

भारत र अमेरिका तर्फ संकेत गर्दै उनले नेपाल सामरिक महत्वको देश भएकाले चिनियाँ विचारधारा लागु गर्न खोज्नु गलत हुने उनले बताए । ‘सिजिङ पिङको विचारधारा कुनै पनि हालतमा नेपालमा लागु हुन सक्दैन ।’ कोइरालाले भने ।‘चीन र नेपालको राजनीतिक फरक भएकाले चिनिया विचार यहाँ कार्यान्वयन हुन नसक्ने उनले बताए ।

नेकपाको सरकारले गणतन्त्र र संघीयता अप्ठ्यारोमा पार्न थालेको कोइरालाले बताए । प्रधानमन्त्री ओलीले सिंगापुर उपचारमा जानु अघि सर्वदलीय वैठकमा संघीयता र गणतन्त्र अप्ठ्यारोमा परेका तर्फ इंगित गर्दै कोइरालाले पुर्व राजा ज्ञानेन्द्र र बिप्लव माओवादीबाट नभई प्रधानमन्त्री ओलीबाटै गणतन्त्र र संघीयतालाई खतरा रहेको बताए । उनले ओली सरकारले अप्ठ्यारोमा पार्न लागेको गणतन्त्र मजबुत बनाउने दायित्व कांग्रेसको काँधमा आएको बताएका थिए ।

कोइरालाले पार्टी नेतृत्वतर्फ इंगित गर्दै पार्टी गिरोहले सञ्चालन गरेकाले कमजोर बनेको आरोप लगाए । उनले गुट उपगुट पार्टीमा निरन्तर रहने प्रकृया भएको दृष्टान्त देखाउँदै गिरोहका कारण मात्र पार्टी कमजोर भएको धारणा राखे । काँग्रेसको भातृ संगठनहरुको नेतृत्व नहुनु र सोच विचार नगरी चुनावका बेला टिकट बाँड्दा पार्टी कमजोर भएको बताए । चुनावमा टिकट वितरणमा समस्या भयो,त्यसको लागि म यहाँहरुसँग माफी चाहान्छु,अब त्यस्तो हुदैन कोइरालाले भने । पार्टी भित्र गुटले चरम समस्या सिर्जना गरेको कोइरालाको भनाई थियो,गुट सबै पार्टी भिक हुन्छ,विपीको समयमा पनि गुट थियो तर अहिले भने बिचारको गुट भएन कोइरालाले भने । कांग्रेसले सुरु गरेको जागरण अभियानमा समेत देशभर पार्टी एक हुन नसकेकोमा उनले चिन्ता व्यक्त गरे ।

कार्यक्रममा काँग्रेस केन्द्रिय सदस्य प्रदिप पौडेलले प्रधानमन्त्री ओलीले रेल र पानी जहाजको सपना देखाएर सरकारले जनतालाई उल्लु बनाउन खोजेको बताए । पूरा हुनै नसक्ने सपना देखाएर कम्युनिष्ट सरकारले प्रपोगाण्डा मच्चाएको आरोप लगाए । काँग्रेस सरकारका पालामा सुरु भएका आयोजना भजाएर सरकारले उपलव्धि देखाएर जनतालाई ढाँटेको उनको आरोप थियो । सरकारकै कारण देशमा भ्रष्ट्रचार मौलाएको पौडेलले बताए ।

कार्यक्रममा लामो समय काँग्रेसमा कृयाशिल रहेका र विभिन्न आन्दोलनमा सहभागि भएका प्रजातन्त्र सेनानीलाई सम्मान गरिएको थियो । माओवादी युद्धमा मारिएका कांग्रेस नेता कार्यकर्ता तिनका आफन्तलाई पनि कार्यक्रममा सम्मान गरिएको थियो । कार्यक्रममा देउवा निकट कांग्रेसका नेता कार्यकर्ताको भने सहभागीता थिएन ।