कार्यदलको बैठक आज पनि बस्दै: महत्वपूर्ण निर्णय गर्ने तयारी
काठमाडौं- लामो समयदेखि नेकपा एमालेमा देखिएको विवाद समाधान नजिक पुगेको छ । कोमामा पुगेको कार्यदल ब्युँतिएसँगै पहिलो बैठकले नै समाधानको खाका तयार गरेको छ । विवाद समाधानका लागि पुनः सक्रिय भएको कार्यदलको बैठक आज मंगलबार पनि बस्दैछ ।
कार्यदलको बैठक सोमबार साँझ पनि बसेको थियो । बैठकपछि दुवै पक्षका नेताहरुले विवाद समाधान हुने अवस्थामा पुगेको भन्दै सकारात्मक रहेको बताएका थिए । सौहार्दपूर्वक छलफल भएको र विवाद समाधान उन्मुख देखिएपछि पार्टीमा अर्कै रौनक आएको छ ।
शुक्रबार बसेको एमाले केन्द्रीय कमिटी बैठकले नेपाली कांग्रेसका सभापति शेरबहादुर देउवालाई प्रधानमन्त्री बनाउने रिटमा गरिएको हस्ताक्षर फिर्ता लिन सोमबार साँझसम्मको अल्टिमेटम दिएको थियो । तर, वरिष्ठ नेता झलनाथ खनाल– माधवकुमार नेपाल समूहले हस्ताक्षर फिर्ता लिएन ।
अल्टिमेटम सकिएलगत्तै कार्यदल ब्यूँताएर पार्टी विवाद हल गर्न छलफल सुरु भएको छ । आजको बैठकले महत्वपूर्ण निर्णय गर्न सक्ने कार्यदलका सदस्यहरुले बताएका छन् ।
जेठ २ गते बनाइएको कार्यदलमा एमाले अध्यक्ष तथा प्रधानमन्त्री केपीशर्मा ओलीको तर्फबाट नेता सुवास चन्द्र नेम्वाङको नेतृत्वमा नेताहरु विष्णु पौडेल, प्रदीप ज्ञवाली, शंकर पोखरेल र विष्णु रिमाल रहेका छन् । खनाल–नेपाल समूहबाट नेता भीम रावलको नेतृत्वमा घनश्याम भुसाल, गोकर्ण विष्ट, सुरेन्द्र पाण्डे र रघुजी पन्त छन् ।