जनार्दन शर्मा देखि विना मगरसम्म मन्त्रीको लाईनमा
प्रधानमन्त्री केपी शर्मा ओलीले शुक्रबार मन्त्रिपरिषद बिस्तारको तयारी गरिरहेका बेला माओवादी केन्द्रले मन्त्री बन्नेहरुको नामावली टुंगो लगाउने अन्तिम चरणमा पुगेको छ ।
१८ सदस्यीय मन्त्रिपरिषदमध्ये माओवादीलाई सात मन्त्रालय दिने सहमति यसअघि भएको थियो । फोरम पनि सरकारमा सहभागी हुने भएपछि माओवादी भागमा परेका मन्त्रालय घटाउने कि मन्त्रिपरिषदको संख्या थप्ने भन्ने विषय टुंगो लागिसकेको छैन ।
माओवादीबाट हाल रामबहादुर थापा बादल र मातृका यादव सरकारमा छन् । माओवादीबाट अब करिब पाँच जना मन्त्रीहरु सरकारमा जानेछन् । यसमा वर्षमान पुन, शक्ति बस्नेत, गिरिराजमणि पोखरेल र विना मगर पक्कापक्की जस्तै रहेको माओवादीका एक नेताले जानकारी दिए ।
पुन, बस्नेत, गिरिराजमणि यसअघि पटक–पटक मन्त्री भइसके पनि विनाका लागि भने पहिलो अवसर हुनेछ । कैलाली १ बाट निर्वाचित विना प्रचण्डकी बुहारी हुन् ।
जनार्दन शर्मालाई पनि मन्त्री बनाउनुपर्ने भनेर छलफल चले पनि कतिपय नेताहरुले उनलाई दोहोर्याउन नहुने बताउँदै आएका छन् । शर्माले यसअघि लगातार ऊर्जा र गृहमन्त्रालय सम्हालेका थिए ।
मन्त्रालयको संख्या र मन्त्रालय टुंगो लागिसकेपछि मात्र अन्तिम नामावली प्रधानमन्त्री ओलीलाई बुझाउने माओवादी अध्यक्ष प्रचण्डको तयारी छ ।