गोविन्दराज जोशीको अभिव्यक्तिले तर्सिए रामचन्द्र पौडेल - Himal Post Himal Post
  • ६ असार २०८१, बुधबार
  •      Wed Jun 19 2024
Logo

गोविन्दराज जोशीको अभिव्यक्तिले तर्सिए रामचन्द्र पौडेल



तनहुँ – नेपाली कांग्रेसका वरिष्ठ नेता रामचन्द्र पौडेलले पार्टीमा अन्तर्घातलाई प्रश्रय दिन नहुने बताएका छन्। पार्टीका पुरा नेता गोविन्दराज जोशीले अन्य पार्टीसँग सहकार्य गर्नसक्ने बताएको केहिदिनमै पौडेलले यस्तो बताएका हुन् ।

केहिदिन अगाडी जोशीले पत्रकार सम्मेलन गरेरै प्रस्ताव लिएर आस्को खण्डमा जो कसैसंग सहकार्य गर्न सकिने बताएका थिए । गत चुनावमा जोशीले पौडेललाई हराउन भूमिका खेलेको भन्दै पार्टीले कारबाही गरेको थियो । त्यसलगत्तै पौडेलको यो भनाईलाई अर्थपूर्ण रूपमा लिन सकिन्छ ।

कांग्रेस तनहुँ क्षेत्र नं १ को आज डुम्रेमा आयोजित पदस्थापन कार्यक्रमलाई सम्बोधन गर्दै वरिष्ठ नेता पौडेलले पार्टीको १४ औं महाधिवेशन सम्पन्न भएर नयाँ नेतृत्व आइसकेकाले अब एकजुट भएर अगाडि बढ्नुको विकल्प नभएको बताए।

‘पार्टीको अधिवेशन सकिएको छ, हिजो जे जसरी चुनाव लडे पनि त्यो आन्तरिक चुनाव थियो, चुनावलाई लिएर अन्तर्घातलाई प्रश्रय दिनुहुँदैन’, उनले भने, ‘कांग्रेस एकढिक्का भएर आगामी आम निर्वाचनमा जानुपर्छ ।’ वरिष्ठ नेता पौडेलले विगतका तीतामीठा अनुभवलाई बिर्सिएर प्रतिपक्षसँग एकजुट भएर लड्नुपर्ने विकल्प नभएको बताए।

वरिष्ठ नेता पौडेलले आफू कहिल्यै पनि पदका लागि आन्दोलन नगरेको उल्लेख गर्दै भने, ‘केपी ओलीविरुद्धको आन्दोलनको नेतृत्व गर्दै गर्दा मलाई प्रचण्डले राष्ट्रपति दिने भयो भनेर पनि अफवाह फैलाए, म पदका लागि आन्दोलन गर्ने मान्छे होइन।’ वरिष्ठ नेता पौडेलले जीवन रहेसम्म जनताको सेवामा लागिरहने प्रतिबद्धता व्यक्त गरे।

कार्यक्रममा केन्द्रीय सदस्य शङ्कर भण्डारी, गोविन्द भट्टराई लगायतले कांग्रेस एकढिक्का हुनुको विकल्प नभएको बताए। कार्यक्रममा कांग्रेस क्षेत्रीय सभापति श्याम मौरातीले पदस्थापन गरेका छन्।