गोठाटार गोलीकाण्ड- चालकले मुख खोले, मालिकलाई गोली हान्यो, आश्चर्यमा परेँ

गोठाटार घटनाका बारेमा चालक बोलेका छन् । सोमबार कागेश्वरी मनहरा नगरपालिका वडा नम्बर ८ स्थित गोठाटार कृष्ण मन्दिर नजिकै अज्ञात व्यक्तिले चलाएको गोली लागेर लाल मोहम्मद भन्ने मोहम्मद दर्जीको मृत्यु भएको छ ।

मोहम्मद चडेको गाडीका चालकले घटनाका बारेमा बोलेका हुन् । चालक रामप्रसाद गौतमले अज्ञात व्यक्तिलाई साइड छाड्न भनेपछि गोली हानेको बताए ।

उनले भने, ‘प्लाष्टिक लिन जोरपाटी गएका थियौँ । घर नजिक आएपछि एकाएक साइडमा मोटरसाइकल रोकियो । साइड छाडिदिन भनेपछि केही भनेन । गाडीबाट झरेपछि मालिकलाई गोली हान्यो । आश्चर्यमा परेँ । एकै पटक गोली चलेको सुनेँ । उहाँले मेरो ज्यानको खतरा भयो भनेर बौद्ध प्रहरीलाई जानकारी गराउनु भएको थियो । गोली प्रहार भएपछि हल्लाखल्ला भएपछि भागे ।’

सर्लाहीको हरिवन घर भएका उनले गोठाटारमै एभेन्जर इन्टरप्राइजेज गार्मेन्ट सञ्चालन गर्दै आएको खुलेको प्रहरीले जनाएको छ ।

रातो रंगको सर्ट लगाएर पल्सर मोटरसाइकलमा आएका व्यक्तिले गोली हानेर भागेको प्रहरीले जनाएको छ। टिचिङ अस्पतालमा उपचारको क्रममा उनको मृत्यु भएको छ ।