गजल

यो आगो किन झोसियो घर भरी सारा खरानी भयो।
गर्दै छौ किन युद्ध यो मनपरी सारा खरानी भयो।।
–
सुस्ताको तन बेचियो विलीन भो पल्लो किनारातिर,
रुन्छिन् यी जननी अहो! धरधरी सारा खरानी भयो।।
–
मेरो सुन्दर देशको लुटिन गो सौन्दर्य लाली कला,
के आशा छ छरोस् ध्वजा फरफरी सारा खरानी भयो!!
–
राख्दै छौ किन द्वेष भेद मनमा डाँडा पखेरासित,
के नाता सब चर्कियो चरचरी सारा खरानी भयो।।
–
ए साथी बिधवा बन्यो रहर यो रित्तो छ पाखा पनि,
झर्दै छन् भल आँसुका झरझरी सारा खरानी भयो।।
–
दीप मिलन
रुद्रपुर रुपन्देही
हाल दोहा कतार
१३ जेष्ठ २०७३