पढाउन जान्नुहुन्न, शिक्षण पेसा त्याग्नुहोस् – गिरीराजमणि पोखरेल

काठमाडौँ —

चाँगुनारायण नगरपालिकाले निर्माण गरेको स्थानीय पाठ्यक्रम सार्वजनिकीकरण कार्यक्रममा सोमबार शिक्षा, विज्ञान तथा प्रविधिमन्त्री गिरीराजमणि पोखरेलले प्रभावकारी शिक्षणसिकाइ गर्न नसक्ने शिक्षकले ठाउँ ओगटेर बस्न नहुने भन्दै पढाउन नसक्ने शिक्षकलाई शिक्षण छाडेर ठाउँ खाली गरिदिन आग्रह गरेका छन्  ।

मन्त्री पोखरेलले भने, ‘शिक्षा क्षेत्र जागीर खाएर बस्ने ठाउँ होइन, यो सक्षम नयाँ पुस्ता बनाउने र भोलिको देश बनाउने ठाउँ हो, अबको सार्वजनिक शिक्षा प्रभावकारी हुनुपर्छ, कक्षाकोठामा प्रभावकारी शिक्षण सिकाइ गर्नुस्, पढाउन सक्दिन भन्ने लाग्छ भने ठाउँ खाली गरिदिनुस्, नयाँ पुस्ता आउँछन्।’

कक्षाकोठा सिकाइकेन्द्रित भएमात्र शिक्षामा क्रान्ति आउने कुरामा जोड दिँदै उनले विद्यार्थीको क्षमताको पहिचान गरेर मात्र शिक्षकले पढाउनुपर्ने औँल्याए। सार्वजानिक शिक्षा गुणस्तरहीन भयो भनी निकै आलोचना भएको भन्दै उनले कमजोर विद्यार्थीको जिम्मा अब शिक्षकले लिनुपर्नेमा जोड दिए।

देशभर अहिले पनि करिब सात लाख शिक्षण अध्यापन अनुमतिपत्र लिएर बसेका शैक्षिक बेरोजगार भएको बताउँदै मन्त्री पोखरेलले शिक्षकले अधिकार मात्रै खोज्ने नभई कक्षाकोठाको सिकाइ उपलब्धि वृद्धि गर्नुपर्ने बताए।

नेपालको शिक्षा प्रणाली अझै पनि घोकन्ते विद्यामै सीमिति रहेको गुनासो गर्दै मन्त्री पोखरेलले भने, ‘एउटा विद्यार्थीलाई कक्षा कोठामा वर्षभरि घोकाउने र तीन घण्टाको परीक्षामा सीमित गरेर मूल्याङ्कन गर्ने शिक्षा प्रणाली नै गलत छ।’ स्थानीय तहलाई खल्तीबाट शिक्षक भर्ना नगर्न आग्रह गर्दै उनले भने, ‘शिक्षक भर्ना गर्दा शिक्षक सेवाबाट उत्तीर्ण भएकालाई गर्नुस्, आफन्त, नातागोता र खल्तीबाट झिकेर शिक्षक भर्ना नगर्नुस्।’

उनले देशभरका सार्वजनिक विद्यालयमा प्राविधिक शिक्षा पुर्‍याएर ८० प्रतिशत विद्यार्थीको हातमा सीप पुर्‍याउने, ३५ हजार विद्यालयमा बिरूवा रोपेर हरित विद्यालयको अभियान सञ्चालन गर्ने सरकारको लक्ष्य रहेको बताए।

कार्यक्रममा जिल्ला समन्वय समितिका प्रमुख नवराज गेलालले चाँगुनारायण इञ्जिनियरिङ कलेज सरकारले लिन नसके चाँगुनारायण नगरपालिकालाई जिम्मा दिन मन्त्रीसँग माग गरे। उनले शिक्षा मन्त्रीले खुट्टा कमाउँदा यहाँका विद्यार्थी र यहाँका सम्पत्ति अलपत्र परेको भनाइ राख्दै चाँगुनारायणको सम्पत्ति नगरपालिकालाई सुम्पन आग्रह गरे।

कार्यक्रममा नगरपालिकाका प्रमुख सोमप्रसाद मिश्रले चाँगुनारायण नगरपालिकाले ‘हाम्रो चाँगुनारायण’ नामक एक सय पूर्णाङ्कको पाठ्यक्रम निर्माण गरी कक्षा ६, ७ र ८ मा एकै पटक लागू गरेको बताए। चालु शैक्षिक सत्रबाट लागू गरिएको पाठ्यक्रम आगामी वर्षबाट थप परिष्कृत र परिमार्जनसहित अन्य कक्षामा समेत लागू गरिने उनले बताए।

(फाइल तस्बिर)