धोनीविरुद्ध खेल्दैछन सन्दीप आज !
काठमाडौं, भारतमा जारी इन्डियन प्रिमियर लिग (आइपीएल) ट्वेन्टी–२० क्रिकेटमा शुक्रबार (आज) नेपाली बलर सन्दीप लामिछाने सम्मिलित दिल्ली डेयरडेभिल्सले महेन्द्रसिंह धोनी नेतृत्वको चेन्नई सुपरकिंग्सँग खेल्दैछ ।
खेल नेपाली समयअनुसार राति सवा ८ बजेदेखि दिल्लीको मैदानमा हुनेछ ।
प्रतियोगिताको ‘प्लेअफ’मा पुग्ने सम्भावना समाप्त भइसकेको दिल्लीका लागि यो खेल प्रतिष्ठाको लडाइँमात्र हुनेछ ।
उता, प्लेअफमा पुगिसकेको चेन्नई जित हासिल गर्दै अंकतालिकामा अझ मजबुत् बन्ने प्रयासमा हुनेछ ।
अघिल्लो खेलमा रोयल च्यालेन्जर्स बैंग्लोरविरुद्ध खेल्दै आइपीएलमा ‘डेब्यु’ गरेका नेपाली लेग स्पीनर सन्दीपले आजपनि मौका पाउने निश्चित प्रायः छ ।
आफ्नो ‘डेब्यु’ खेलमा उत्कृष्ट प्रदर्शन गर्दै सन्दीपले ४ ओभरमा १ विकेट लिएर २५ रन खर्चिएका थिए ।