युनिफिकेसन चर्चसँग सम्बन्ध भएका जापानी मन्त्रीले राजीनामा दिए, ढकाल भने एमालेबाट सांसद बन्दै

युनिफिकेसन चर्च विवादका कारण जापानमा तरङ्ग पैदा भएको छ । चर्च अनुसन्धानको घेरामा परेपछि चर्चसँगको आफ्नो सम्बन्धबारे स्पष्ट पार्न नसकेका कारण जापानका एक जना मन्त्रीले पदबाट नै राजीनामा दिएका छन्।

अन्तराष्ट्रिय समाचार संस्था रोयटर्सका अनुसार आर्थिक पुनरूत्थान मन्त्री दाइसिरो यामागिवाले सोमबार राजीनामा दिएका हुन्। उनको राजीनामाले जापानको राजनीतिक वृत्तमा छुट्टै बहस सिर्जना गरेको छ ।

प्रधानमन्त्री फुमिओ किसिदाले उनको राजीनामा स्वीकार गरिसकेका छन्। गत साता मात्रै प्रधानमन्त्री किसिदाले युनिफिकेसन चर्चमाथि अनुसन्धान गर्न निर्देशन दिएका थिए।

पूर्वप्रधानमन्त्री सिन्जो आबेको हत्यामा उक्त चर्च जोडिएपछि किसिदाले अनुसन्धान गर्न निर्देशन दिएका थिए । हालै चुनावी अभियानमा रहेका बेला आबेलाई गोली हानिएको थियो। आबेलाई गोली हान्ने व्यक्तिले आफ्नी आमाले थुप्रै पैसा चर्चलाई दान दिएको र त्यसैका कारण टाट पल्टिएको बताएका थिए ।

आबेले त्यही चर्चलाई प्रवर्द्धन गरेको भन्दै उनीमाथि गोली हानेको ती व्यक्तिले बताएका थिए । त्यसपछि उक्त चर्चसँग राजनीतिज्ञहरूको सम्बन्ध र राजनीतिक सम्बन्धकै कारण उक्त चर्चले पाएका सुविधाबारे छानबिन गर्न चर्को माग उठेको थियो।

उक्त चर्चसँग विभिन्न नेताहरूको सम्बन्ध देखिएपछि प्रधानमन्त्री किसिदाले माफी समेत मागीसकेका छन् । उक्त चर्चमाथि अनुसन्धान गर्न सुरूमा आनाकानी गरेका प्रधानमन्त्री किसिदाले सोमबार चर्चमाथि तत्काल अनुसन्धान गर्न निर्देशन दिएका हुन्।

उक्त अनुसन्धान सुरू भएपछि राजीनामा दिने यामागिवा पहिलो मन्त्री हुन्। युनिफिकेसन चर्चको स्थापना सन् १९५० को दशकमा कोरियाली नागरिक सन म्योङ मुनले स्थापना गरेका हुन्।

केही वर्षपछि यसको बिस्तार जापानमा पनि भएको थियो। चर्चले आफ्ना स्टाफहरूलाई नेताहरूको कार्यालयमा स्वंयसेवकका रूपमा पठाउने गर्छ। त्यसैबाट राजनीतिक सम्बन्ध बिस्तार गर्छ।

युनिफिकेसन चर्चले नेपालमा पनि राम्रै प्रभाव जमाएको छ । यो चर्चमा नेपालका पूर्वमन्त्री एकनाथ ढकाल पनि जोडिएका छन्। उक्त चर्चका नाममा उनले नेपालमा विभिन्न कार्यक्रम गरिरहेका छन्। एकनाथ ढकाल अहिले प्रतिनिधि सभा सदस्यका लागि नेकपा (एमाले) को समानुपातिक सूचीमा छन्। उनलाई सांसद बनाउन एमाले अध्यक्ष केपी ओली नै लागेका छन्।

२०७२ मा केपी शर्मा ओली पहिलो पटक प्रधानमन्त्री हुँदा उनी फेरि शान्ति मन्त्री बनेका थिए। त्यसपछि २०७५ मंसिर एकनाथको युनिफिकेसन चर्चले काठमाडौंमा एसिया प्यासिफिक सम्मेलन गरेको थियो।

उक्त सम्मेलनका नेपालका सबै राजनीतिक दलका प्रमुख नेताहरू सहभागी भएको र उनीहरूले होली वाइन पिएको भन्दै आलोचना भएको थियो।

एमाले अध्यक्ष केपी शर्मा ओलीसँग निकट सम्बन्धका कारण आगामी मंसिर ४ गते हुने प्रतिनिधि सभा चुनावका लागि पनि उनी एमालेको समानुपातिक सूचीमा परेका हुन्।