सपथ लिएलगत्तै सीके राउतले तीन मन्त्रालयलाई पत्र लेखेर दिए दवाव

जनमत पार्टीका अध्यक्ष तथा नवनिर्वाचित सांसद डा. सीके राउतले बिहीबार सपथ लिएलगत्तै विभिन्न मन्त्रालयलाई दवाव दिएका छन् । उनले संघीय सरकारका तीनवटा मन्त्रालयलाई पत्र लेखेरै दवाव दिएका हुन् ।

उनले स्वास्थ्य तथा जनसंख्या मन्त्रालयका सचिवलाई पत्र लेखेर सप्तरीको सगरमाथा अस्पतालको सुधारको माग गरेका छन् । यस्तै पर्यटन, नागरिक उड्डयन मन्त्रालयका सचिवलाई पत्र लेखेर डा. राउतले राजविराजमा हवाई उडान बढाउन र नियमित गर्न माग गरेका छन् ।

उनले कृषि मलको व्यवस्थाका लागि कृषि मन्त्रालयका सचिवलाई पत्र लेखेका छन् । यस्तै उद्योग तथा वाणिज्य मन्त्रालयलाई पत्र लेखेर गजेन्द्रनारायण औद्योगिक क्षेत्र सञ्चालनको माग गरेका छन् ।

डा. राउतले पाँचवटा विषयमा विभिन्न मन्त्रालयलाई आफूले पत्र लेखेको जानकारी दिएका छन् । सप्तरी २ बाट निर्वाचित सांसद राउतले बिहीबारै पद तथा गोपनीयताको शपथ लिएका थिए ।