चीनमा रहेका विद्यार्थीका आमाबुवाको गुनासो: सरकारले सक्दैन भने अरु मुलुकसँग सहारा माग्छौं
काठमाडौं- चीनमा रहेका नेपाली विद्यार्थीका अभिभावकहरु आफना छोरा–छोरीलाई नेपाल ल्याउन हारगुहार गर्दै दिनहुँजस्तो विभिन्न निकाय धाइरहेका छन् ।
चीनमा ‘कोरोनाभाइरस’का कारण सयौंको ज्यान गएपछि नेपाल आउन चाहेका १८० जना विद्यार्थीलाई नेपाल ल्याउन सरकारले आवश्यक तयारी गरिरहेको बताइरहेको छ ।
उनीहरुका अभिभावकले आइतबार आफ्ना छोरा–छोरी नेपाल फर्काउन याचना गर्दैै मानवअधिकार आयोगमा ज्ञापनपत्र बुझाएका छन् ।
चीनमा रहेका डा. गौरव पोखरेलले मानवअधिकार आयोगका अध्यक्ष अनुपराज शर्मासँग भिडियो कुराकानी गरे ।
‘युरोलोजी’मा ‘पीएचडी’ सकेर नेपाल आउने तयारीमा रहेका उनी कोरोनाभाइरसको त्रासका कारण विगत १५ दिनदेखि वुहानमा कोठामै थुनिएर बस्न बाध्य छन् ।
गौरवजस्तै अरु धेरै नेपालीको अवस्था यस्तै छ ।
उनीहरुका अभिभावक छोरा–छोरीलाई छिटो नेपाल ल्याउन माग राख्दै पछिल्लो समय दिनहुँ सरकारी निकाय धाइरहेका छन् ।
गत शुक्रबार परराष्ट्र र गृहमन्त्रीलाई भेटेका उनीहरुले आइतबार मानवअधिकार आयोगका अध्यक्ष शर्मालाई भेटेका छन् ।
सरकारले आश्वासनमात्र दिएको भन्दै उनीहरुले अध्यक्ष शर्मालाई नै अभिभावकत्व लिएर आफ्ना छोरा–छोरीलाई छिटो नेपाल ल्याउन आवश्यक पहल गरिदिन आग्रह गरेका छन् ।
‘सरकारले हाम्रो कुरा सुनेन, हामी कहाँ जाने ? संक्रमण बढ्दै छ, कुनै अप्रिय घटना भएको खण्डमा त्यसको जिम्मेवारी कसले लिन्छ ?’ उनीहरुको प्रश्न छ ।
आफ्ना छोरा–छोरी मानसिकरुपमा पनि कमजोर हुन थालेको उनीहरुको दुखेसो छ ।
‘सरकारले सक्दैन भने हामी अरु मुलुकसँग सहारा माग्छौं, अन्तर्राष्ट्रिय सहयोग माग्छौं’ भन्दै उनीहरुले आक्रोशसमेत पोखे ।
जवाफमा अध्यक्ष शर्माले चीनमा रहेका नेपाली विद्यार्थीलाई सकुशल नेपाल ल्याउन आफ्नो तर्फबाट सक्दो पहल गर्ने आश्वासन दिए ।
सरकारले एक हप्ताअघि नेपाल आउन चाहने नेपालीको नाम संकलन गरेको थियो । तर, नाम संकलन गरेको एक साता बितिसक्दा पनि उनीहरुलाई कहिले नेपाल ल्याउने कुनै टुंगो छैन । इमेजखबरले तयार पारेको रिपोर्ट