सिन्धुपाल्चोकको प्रहरी चौकीमा आक्रमण
सिन्धुपाल्चोकको तिपेनीस्थित प्रहरी चौकीमा मध्यराति आक्रमण भएको छ।
अज्ञात समूहले गरेको आक्रमणबाट प्रहरी चौकीका इन्चार्जसहित दुई प्रहरी घाइते भएका छन्।
शुक्रबार राति १ बजे १०/१२ वटा मोटरसाइकलमा आएको समूहले एक्कासि प्रहरी चौकीमा ढुंगामुढा गरेका हुन्।
आक्रमणबाट प्रहरी चौकीका इञ्चार्ज असइई सन्तोषकुमार झा र प्रहरी हवल्दार हरिबहादुर मगर घाइते भएको सिन्धुपाल्चाेक जिल्ला प्रहरी कार्यालयका प्रहरीले जनाएको छ।
अन्धाधुन्द आक्रमण भएपछि प्रहरीले आत्मरक्षाका लागि ४ राउण्ड हवाइ फायर गरेको थियो। आक्रमणमा संलग्गन मध्ये एक जना र दुइ मोटरसाइकाल नियन्त्रणमा लिएको छ।
घटनालगतै इलाका प्रहरी कार्यालयबाट प्रहरी निरीक्षकको नेतृत्वमा प्रहरी टाेली तिपेनीमा गएको छ भने जिल्ला प्रहरी प्रमुख एसपी प्रज्वल महर्जन पनि राति नै घटनास्थल पुगेका छन्।
प्रहरी चौकीमा किन आक्रमण गरियो भन्ने अहिलेसम्म थाहा हुन सकेको छैन। अनुसन्धान सुरु गरिएकाे प्रहरीले जनाएकाे छ।