चस्मा किन्दा फ्रेमको रङ यसरी छनोट गर्नुस - Himal Post Himal Post
  • १३ जेष्ठ २०८१, आईतवार
  •      Sun May 26 2024
Logo

चस्मा किन्दा फ्रेमको रङ यसरी छनोट गर्नुस



सुजन पन्थी

फेसन डिजाइनर

लाफ डिजाइन स्टुडियो, लाजिम्पाट

पावर भएको होस् या पावर नभएको, आँखाको सुरक्षाका लागि चस्मा अनिवार्य साधनजस्तो बनेको छ । बाहिर निस्किँदा सामना गर्नुपर्ने धुवाँ–धुलो र सूर्यको किरणको असरबाट आँखालाई जोगाउन चस्मा आवश्यक छ । चस्मा लगाउनुलाई फेसनका रूपमा समेत लिइन्छ । स्टाइलिस बन्न विभिन्न मोडेलका चस्मा लगाउने चलन छ ।

साँच्चै आँखाको सुरक्षाबाहेक फेसनका रूपमा पनि प्रयोग गर्नुहुन्छ भने चस्मा किन्दा फ्रेमको रङमा पनि ख्याल पुर्‍याउनु जरुरी हुन्छ । फ्रेमको रङ छनोट गर्दा लगाउने व्यक्तिको स्किन, आँखा र कपालको रङलाई आधार मान्नुपर्छ । फेसन डिजाइनर सुजन पन्थीले टिप्स दिएका छन् :

१.गाढा खैरो रङको कपाल छ भने चस्माको फ्रेम कालो, निलो या गुलाबी रङको रोज्नुहोस् । यी तीनवटै रङ सुहाउँछ ।

२. फिक्का खैरो कपाल छ भने कालो, निलो रङको फ्रेम सुहाउँदैन । यस्तो कपाल भएकाले रातो र प्याजी रङको फ्रेम रोज्नु उपयुक्त हुन्छ ।

३.ब्लन्ड हेयर (सुनौलो रङको कपाल) मा भने हरियो रङको फ्रेम सबैभन्दा उत्कृष्ट देखिन्छ ।

४.कपालको रङ कलरिङ गरेर रातो पार्नुभएको छ भने चस्माको फ्रेम कालो या हरियो रोज्दा सुहाउँछ ।

५.अधिकांश नेपालीको कपाल कालो नै हुन्छ । कालो कपालमा कालो फ्रेमकै चस्मा आकर्षक देखिन्छ । कालोबाहेक निलो र खरानी रङको फ्रेम पनि लगाउन सकिन्छ ।

६.पाको उमेरपछि कपाल फुल्ने गर्छ । आजकाल त कतिपयले युवावस्थामै कपाल रंग्याएर सेतो बनाउने गर्छन् । तपाईंको पनि कपाल सेतो छ भने हल्का निलो या चहकिलो रातो रङको फ्रेम भएको चस्मा सुहाउँछ ।

७.आँखाको रङ खैरो प्रकृतिको छ भने चस्माको फ्रेम पनि खैरो, हरियो या सुनौलो खालको लगाउनु सुहाउँदो हुन्छ ।

८.हरियो फ्लेवरको आँखामा भने खैरो, सुनौलो या गुलाबी रङको फ्रेम भएको चस्मा आकर्षक देखिन्छ ।

९.निलो आँखामा भने निलो रङकै फ्रेमको चस्मा राम्रो देखिन्छ । यस्तो आँखामा खैरो र खरानी रङको फ्रेम पनि सुहाउँछ ।

साभार नया पत्रिका