बुटवलको होटलमा रहस्यमय घटना : एक जोडीकाे शव भेटियाे
बुटवल- रुपन्देहीको एक होटलमा एक जोडी युवा युवती मृत फेला परेका छन् । तिनाउ पूल पारी फूलबारी नजिकैको कारिकोट होटलको कोठामा एक जोडी मृत फेला परेको इलाका प्रहरी कार्यालय बुटवलले जनाएको छ ।
प्रहरीका अनुसार युवा युवतीको रहस्यमय रूपमा मृत्यु भएको भेटिएको हो । प्रहरी कार्यालयका डीएसपी ठगबहादुर केसीका अनुसार अन्दाजी ३५ वर्षका सिताराम भुजेल र नाम–ठेगाना स्पष्ट नखुलेकी अन्दाजी २५ वर्षीया युवती मृत फेला परेका हुन् ।
सिताराम भुजेलको घर धादिङ भएको खुलेको छ । भने युवतीकोनाम-ठेगाना खुलेको छैन । भुजेल धादिङकाे कुमपुर–५ का बासिन्दा रहेको र युवतीको नाम पुष्पा भनिए पनि थर र घरको ठेगाना खुल्न नसकेको जनाइएको छ ।
काेठाकाे तन्ना र टावेलमा रगत लतपतिएकाे देखिएकाेले घटना रहस्यमय भएको प्रहरीले जनाएको छ ।
प्रारम्भिक अनुसन्धान अनुसार सितारामले युवतीको हत्या गरी आफूले आत्माहत्या गरेको हुन सक्ने बताइएको छ ।
प्रहरीका अनुसार उनीहरू आइतबार राति त्यस होटलमा बस्न आएका थिए । उनीहरूको शव पोष्टमार्टमका लागि लुम्बिनी प्रादेशिक अस्पतालमा पठाइएको र घटनाको अनुसन्धान भइरहेकाे प्रहरीले जनाएकाे छ ।