विद्यालयमा बम फेला

सिमकोट :

खार्पुनाथ गाउँपालिका–५, हुम्लास्थित बागेश्वरी आधारभूत विद्यालयमा दुईवटा सकेट बम फेला परेको छ । आज बुधबार बिहान वागेश्वरी विद्यालयको खेल मैदान निर्माण गर्ने क्रममा ढुङ्गाको आडमै राखिएको अवस्थामा सकेट बम फेला परेको विद्यालयका प्रधानाध्यापक गणेशबहादुर शाहीले बताए ।

शाहीअनुसार विद्यालय अगाडिको खेलमैदान स्थानीयले मर्मत गर्ने क्रममा आज बिहान अचानक शङ्कास्पद वस्तु भेटिएको थियो । त्यसपछि विद्यालयले काम स्थगन गरी ठेहे प्रहरी चौकीलाई खबर गरेको थियो ।

खबर पाएपछि दोजाम प्रहरी चौकीका प्रहरी सहायक निरीक्षक सिन्तामोणी पोखरेलको टोली त्यस क्षेत्रमा पुगेर निरीक्षण गर्दा पुराना दुईवटा सकेट बम रहेको पुष्टि प्रहरीले गरेको छ ।

हुम्ला जिल्ला प्रहरी कार्यालयअनुसार अहिले उक्त बम निष्क्रिय पार्न सिमकोटबाट नेपाली सेनाको डिस्पोजल टोली त्यसतर्फ पठाइएको छ । जिल्लामा सुरक्षा व्यवस्था कडा बनाइएको प्रमुख जिल्ला अधिकारी धोलक राज ढकालले बताए । सकेट बम भेटिएको क्षेत्रमा स्थानीयलाई आवतजावत गर्न दिइएको छैन।