सुकुटे बस दुर्घटना: ज्यान गुमाउनेको संख्या १५ पुग्यो, केहीको सनाखत

सिन्धुपाल्चाेक – सुकुटेमा भएको बस दुर्घटना ज्यान गुमाउनेको संख्या १५ पुगेको छ । दोलखाको मागा देउरालीबाट काठमाण्डौ जाँदै गरेको बस दुर्घटना भएको थियो ।

जिल्ला प्रहरी कार्यालय सिन्धुपाल्चोकका अनुसार दुर्घटनामा ज्यान गुमाउनेको संख्या १५ पुगेको बताइएको छ। जसमा तीन महिने शिशुको पनि मृत्यु भएको छ । प्रहरीका अनुसार दुर्घटनामा ज्यान गुमाएकामध्ये पाँच जनाको सनाखत भएको छ ।

दुर्घटनामा भीमेश्वर नगरपालिका-९ की २४ वर्षीया रञ्जिता केसी, शैलुङ गाउँपालिका ३ की ५१ वर्षीया रत्नकुमारी रावत, त्यसै ठाउँकी तीन महिने शिशु सिसम तामाङ, सिन्धुपाल्चोकको त्रिपुरा सुन्दरी गाउँपालिकाकी २७ वर्षीया चमेली श्रेष्ठ र उहाँकी ६ वर्षीया छोरी साइरामी श्रेष्ठको ज्यान गएको जिल्ला प्रहरी कार्यालय सिन्धुपाल्चोकका प्रहरीले जनाएको छ।

त्यस्तै दुर्घटनामा घाइते भएका ५० जनाको धुलिखेल अस्पताल र सिन्धुपाल्चोकको सिन्धु सदाबहार अस्पतालमा उपचार भैरहेको छ । घटनास्थलमा उद्धार कार्य जारी रहेको प्रहरीले जनाएको छ । फाइल तस्बिर