गगन थापाले मागे गृहमन्त्री बादलको राजीनामा

काठमाडौं । नेपाली कांग्रेसका केन्द्रीय सदस्य गगन थापाले शान्ति सुरक्षा दिन नसक्ने गृहमन्त्रीले राजीनामा दिनुपर्ने माग गरेका छन् । “हामीलाई सुरक्षा दिने गृहमन्त्री चाहिएको हो,” नेपाल प्रेस युनियनले गरेको कार्यक्रममा सोमबार थापाले भने, “तर्साउने गृहमन्त्री होइन । शान्तिसुरक्षा दिन नसक्ने गृहमन्त्रीले आजै राजीनामा दिनुपर्छ ।”

विप्लवले जनसेना गठन गरेको र उपत्यकालाई केन्द्र बनाएको भन्ने गृहमन्त्रीको भनाइ रहेको उल्लेख गर्दै यति जानकारी राख्दाराख्दै पनि किन सुरक्षा दिन नसकेको भन्दै प्रश्न गरे । थापाले सरकारले अधिनायकवादतर्फ जान लागेको बताउँदै भने, “राजा ज्ञानेन्द्रलाई ठेगान लगायौं । अब राजा बन्न खोज्नेलाई रोक्ने तागत पनि हामीसँग छ ।”

उनले त्यसका लागि कांग्रेसको सुदृढिकरण हुन जरुरी रहेको बताए । उनले आतंक, आपराधिक घटनाको पनि विरोध गरे ।