पुनर्वास प्रहरीको सक्रियतामा दुई किलो चरेस सहित दुई जना पक्राउ
सुनिलकुमार लो
पुनर्वास,कञ्चनपुर । पुनर्वासको दोदा पुलमा आज ईलाका प्रहरी कार्यालय, त्रिभुवन बस्तीबाट गएको प्रहरी गस्तीले दुई जनालाई लागुपदार्थ चरेस सहित पक्राउ गरेको छ । पक्राउ परेका दुईजनाबाट दुई किलो कालो चरेस बरामद गरीएको हो ।
पुनर्वासबाट धनगढी तर्फ गईरहेको से.४ प ६९१ नम्बरको अपाची मोटरसाईकलमा यात्रा गरिरहेका व्यक्तिहरुलाई शंका लागी खानतलासी गर्दा सो लागुपदार्थ प्राप्त भएको हो ।
पक्राउ पर्नेमा धनगढी उपमहानगरपालिका-१,पशुपति टोल निवासी बर्ष ३५ का सामे आलम र सोहि ठाउँ बस्ने बर्ष ३५ का सुनिल शर्मा भएको ईलाका प्रहरी कार्यालयका ईञ्चार्ज कर्ण बहादुर बमले बताउनुभएको छ ।
केही समय यता पुनर्वास प्रहरीको सक्रियतामा उल्लेख्य वृद्धि भएको र यसले यस क्षेत्रको शान्तिसुरक्षामा सकारात्मक प्रभाव परिरहेको स्थानीय वासीहरुले बताएका छन ।