दवावमा नपरी कानुन अनुसार काम गर्छु : डिएसपी सिंह

लोकेन्द्र रावल
टीकापुर ,कैलाली । ईलाका प्रहरी कार्यालय टीकापुरका प्रमुख डिएसपी शिवबहादुर सिंहले प्रहरी र पत्रकारबीच नङ र मासुको सम्बन्ध हुनुपर्ने बताउनु भएको छ ।समाजका लागि प्रहरी हतियार सहितको सिपाई र पत्रकार विना हतियारको सिपाई भएकाले दुवै पक्ष एक अर्काका परिपुरक भएका बताउनु भयो ।

बिहीबार ईलाका प्रहरी कार्यालय टीकापुरमा पत्रकारसंग भएको परिचयात्मक कार्यक्रममा समाज रुपान्तरणमा प्रहरी र पत्रकार दुबैको भूमिका महत्वपूर्ण हुने बताउनु भयो । उहाँले प्रहरीले गरेका राम्रा काम का लागि सहयोग गर्न र नराम्रो कामको लागि खबरदारी गर्न समेत आग्रह गर्नुभयो ।

कार्यक्रममा डिएसपी सिंहले यो क्षेत्रमा लागु औषध, ढुकुटी र सिमा बाट हुने तस्करी अली बढी समस्या को रुपमा रहेको जानकारीमा आएकाले त्यसको समाधानको लागि योजना बनाएर काम गर्ने प्रतिवद्धता जनाउनु भएको थियो । आफू कसैको लोभ लालचमा नपरी कानुन अनुसार काम गर्ने बताउँदै डिएसपी सिंहले यदी आपूले कानुन विपरित काम गरे मिडीयामा ल्याई दिन समेत आग्रह गर्नुभयो ।

कार्यक्रममा सहभागि पत्रकारहरुले प्रहरीले गरेका राम्रा कामहरुलाई साथ दिंदै आएको र अवका दिनमा पनि पत्रकारहरु राम्रा कामका पक्षमा रहेको बताएका छन् ।

पत्रकारहरुले ईलाका प्रहरी कार्यालय टीकापुरको कमाण्ड समालेका कोही डिएसपीहरु राम्रैसंग विदाई भएर गएका र कोही रातारात पनि भागेकाले आफूहरुले राम्रो कामको अपेक्षा गरेको बताएका थिए । उनीहरुले कसैको यस म्यानका रुपमा नभई समाजको रक्षकको रुपमा काम गर्न डिएसपी सिंहलाई सुझाव दिएका थिए ।