धारिलो हतियार प्रयोग गरी बालिकाको हत्या

अन्नपूर्ण : दमक । मोरङको सुनवर्षी–नगरपालिका–७ मा धारिलो हतियारले घाँटी रेटेर एक बालिकाको हत्या भएको छ । ७ वर्षीया बालिका आफ्सना खातुनको हत्या भएको हो ।

सुनवर्षी–७ मलदैया टोल बस्ने ताईफुर मियाँको छोरी खातुनको शव घरदेखी अन्दाजी ५ सय मिटर उत्तरमा रहेको मकै बारीमा भेटिएको थियो । उनको धारिलो हतियारले घाँटी रेटेर हत्या गरिएको अवस्थामा शव फेला परेको प्रहरीले जनाएको छ । शुक्रबार दिउँसो आप्सना घाँस काट्न बारीतिर निस्किएकी थिइन् ।

उनी साँझसम्म घर नफर्केपछि बाबुले खोजी गर्दै जाँदा छोरीको शव मकैबारीमा भेटेका थिए । घटनास्थलको मुचुल्का उठाएर शव पोष्टमार्टमका लागि रंगेली अस्पताल पठाइएको इलाका प्रहरी कार्यालय रंगेलीले जनाएको छ । हत्या कसले गरेको हो भन्ने बारे अनुसन्धान कार्य भई रहेको प्रहरीको भनाई छ ।