कञ्चनपुरबाट बिना मगरलाई मन्त्री बनाउन जोडदार माग

महेन्द्रनगर,कञ्चनपुर ।।  नेकपा एमालेका अध्यक्ष केपी शर्मा ओली नेतृत्वको वाम गठबन्धन सरकारमा कञ्चनपुरबाट निर्वाचित सांसद बिना मगरलाई मन्त्री बनाउनुपर्ने आवाज उठेको छ ।

प्रतिनिधिसभा सदस्य निर्वाचनमा माओवादी केन्द्रबाट सर्वाधिक मतान्तरले जित्ने महिलाको रेकर्ड समेत बनाएकी बिना मगरलाई मन्त्रिपरिषद्मा समावेश गरेर महिला र जनमतको सम्मान गरिनुपर्ने जिल्लावासीले माग गरेका छन् । वाम गठबन्धनबाट प्रदेश सरकारमा जिल्लाको प्रतिनिधित्व नभएपछि केन्द्र सरकारमा समेत प्रतिनिधित्व गुम्न सक्ने भन्दै जिल्लावासीले जोडदार आवाज उठाएका हुन् ।

वाम गठबन्धनले ७ नम्बर प्रदेश सरकार बनाउँदा कञ्चनपुरबाट कसैलाई पनि सरकारमा समावेश गरेका छैनन् । ३ प्रतिनिधिसभा र ६ प्रदेशसभा निर्वाचन क्षेत्र रहेको कञ्चनपुर जिल्ला ७ नम्बर प्रदेशको कैलालीपछि बढी जनसंख्या भएको जिल्ला हो । ‘७ नम्बर प्रदेश सरकार निर्माण गर्दा पनि कञ्चनपुरलाई हेपिएको छ, केन्द्र सरकारमा जसरी पनि बिना मगरलाई मन्त्री बनाउनैपर्छ,’ बेल्डाँडीस्थित सरस्वती माविकी शिक्षिका वागमती विष्टले भनिन् ।

वाम गठबन्धनले कञ्चनपुरलाई महत्व नदिएको भनेर आलोचना भइरहेका बेला केन्द्र सरकारमा बिना मगरलाई मन्त्री बनाउन माग गरिएको छ । बिना मगरलाई मन्त्री बनाए कञ्चनपुरका वाम मतदाताको जनमतको कदर हुने शुक्लाफाँटा नगरपालिकाको झलारीका रमेश भट्टले बताए ।

कांग्रेसको सरकार बन्दा रमेश लेखक र एनपी सावद पटक–पटक मन्त्री हुने गरेका थिए । तसर्थ, वाम गठबन्धनको सरकारमा कसैलाई पनि मन्त्री नबनाइए वाम गठबन्धन प्रतिको आकर्षण घट्ने तर्क गरिएको छ । ‘वाम गठबन्धन र सरकारप्रति अपनत्व कायम गराउन एमाले र माओवादी नेतृत्वले ध्यान दिनुपर्छ,’ भट्टले भने, ‘प्रदेश सरकारमा कञ्चनपुरलाई स्थान नदिएर गरिएको त्रुटिलाई सच्याउन पनि केन्द्र सरकारमा बिना मगरलाई मन्त्री बनाउनुपर्छ ।’

निर्वाचनमा प्रतिस्पर्धीभन्दा दोब्बर मतान्तरले विजयी भएपछि बिना मगरको लोकप्रियता पुष्टि भएको थियो । बिना मगरको लोकप्रियता योगदान र क्षमताको मूल्याङ्कन गर्दै पार्टी र वाम गठबन्धनले मन्त्री बनाउनुपर्ने तर्क गरिएको छ । ‘देशको पछिल्लो राजनीतिक परिवर्तनमा बिना मगरले गरेको योगदानको सम्मान हुनेछ भन्ने आशामा छौं,’ बेलौरीका नवराज विष्टले भने, ‘राजनीतिक परिवर्तनका लागि सेनाको हिरासतमा रहेर यातना सहनु अतुलनीय योगदान हो ।’

प्रतिनिधिसभा सदस्य र प्रदेशसभा सदस्य निर्वाचनमा सुदूरपश्चिमका वाम गठबन्धनका उम्मेदवारमध्ये बिना मगर सर्वाधिक मतान्तरले विजयी भएकी थिइन् । ‘बिना मगरप्रति कञ्चनपुरका जनता र सुदूरपश्चिमवासीका थुप्रै अपेक्षा छन्, त्यो अपेक्षा मतपरिणामबाट समेत झल्किन्छ,’ पुनर्वासका कृष्ण तामाङले भने, मतदाताले बिना मगरले जनताको सेवा गर्ने अवसर दिएका छन्, अब पार्टीले समेत उचित मूल्याङ्कन गर्दै यस क्षेत्रको तीब्र विकासका लागि बिना मगरलाई मन्त्री बनाउनुपर्छ ।’

मतदाताले बिना मगरले जनताको सेवा गर्ने अवसर दिएका छन्, अब पार्टीले समेत उचित मूल्याङ्कन गर्दै यस क्षेत्रको तीब्र विकासका लागि बिना मगरलाई मन्त्री बनाउनुपर्छ ।

‘सांसदले कानून बनाउने काम मात्रै गर्ने हामीले सुनेका छौं, विकास निर्माणका लागि सरकारमा सहभागी हुनुपर्छ,’ लालझाडी गाउँपालिकाका करविर रानाले भने । प्रधानमन्त्री केपी शर्मा ओलीले १–२ दिनभित्र मन्त्रिपरिषद् विस्तार गर्ने तयारी गरेका छन् । मन्त्रिपरिषद् विस्तार हुने सुनेपछि कञ्चनपुरका जनताले बिना मगरलाई मन्त्री बनाउन माग गरेका हुन् ।

बिना मगर बाल्यकालदेखि बालकलाकार हुँदै वामपन्थी आन्दोलनमा सहभागी भएर जनयुद्धमा होमिएकी थिइन् । जनयुद्धकालमै विद्यार्थी राजनीतिमा रहेकी बिना मगरलाई तत्कालीन शाही सेनाले नियन्त्रणमा लिएर चरम यातना दिएको थियो । बिना मगर कञ्चनपुरको दुर्गम क्षेत्र पुनर्वासमा जन्मिएर राष्ट्रिय राजनीतिमा लोकप्रिय बनेकी छन् । karnalikhabar बाट