अर्जेन्टिना र क्रोएसियाको यस्तो छ इतिहास

एजेन्सी – उपाधि दावेदार अर्जेन्टिना र साविकको उपविजेता क्रोएसिया फिफा विश्वकप कतार २०२२ को सेमिफाइनलमा भिड्दैछन् । खेल नेपाली समयअनुसार मंगलबार मध्यरात १२:४५ बजे (बुधबार विहान) लुसेल रंगशालामा हुनेछ ।

अर्जेन्टिना र क्रोएसिया दुवै क्वाटरफाइनलमा पेनाल्टी सुटआउटमा विपक्षी टोलीलाई पन्छाउँदै अन्तिम चारमा प्रवेश गरेका हुन् । यी दुई टोली यसअघि फिफा विश्वकपमा दुई पटक आमनेसामने भएका छन् । सन् १९९८ मा अर्जेन्टिनाले १-० को जित दर्ता गरेको थियो । त्यस्तै सन् २०१८ मा भने क्रोएसियाले ३-० को यादगार जित हासिल गरेको थियो ।

क्रोएसियाले हालसम्म दुई पटक विश्वकपको सेमिफाइनलमा प्रतिस्पर्धा गरेको छ । सन् १९९८ मा फ्रान्ससँग पराजित भएको क्रोएसियाले सन् २०१८ मा भने इंग्ल्यान्डलाई पराजित गर्दै फाइनलमा स्थान बनाएको थियो । अर्जेन्टिनाले हालसम्म सेमिफाइनलमा हार बेहोरेको छैन । सन् १९३० मा अमेरिका, १९८६ मा बेल्जियम, १९९० मा इटाली र २०१४ मा नेदरल्यान्ड्सलाई हराउँदै अर्जेन्टिना फाइनलमा पुगेको छ ।

अर्जेन्टिनाले पछिल्लो ४१ अन्तर्राष्ट्रिय खेलमा मात्र साउदी अरेबियासँग एक खेल हार बेहोरेको छ । अर्जेन्टिनाले युरोपेली राष्ट्रविरुद्ध विश्वकपमा खेलेको नकआउट चरणको १४ मध्य ८ खेल अतिरिक्त समयमा लम्बिएको छ । मेस्सीले लोथार मथाउसको सर्वाधिक २५ खेलको कीर्तिमान बराबरी गर्नेछन् ।

यता क्रोएसियाले पछिल्लो १२ विश्वकप खेलमा एकमात्र हार बेहोरेको छ । पछिल्लो १० नकआउट खेलमा टोलीले ८ जित दर्ता गरेको छ । तर क्रोएसियाको पछिल्लो ६ मध्य ५ खेल अतिरिक्त समयमा लम्बिएको छ ।