रेनुलाई चुनाव जिताए गठबन्धनलाई वर्षौंसम्म टिकाउँछु: प्रचण्ड

नेकपा माओवादी केन्द्रका अध्यक्ष पुष्पकमल दाहाल प्रचण्डले भरतपुर महानगरपालिकामा रेनु दाहालले चुनाव जिते गठबन्धनलाई वर्षौंसम्म टिकाउने बताएका छन् ।

भरतपुरको चुनावीसभामा सम्बोधन गर्दै उनले भने, ‘भरतपुरमा गठबन्धनका उम्मेदवार रेनु दाहाल र चित्रसेन अधिकारीको टिमले जिते म निकै उत्साही हुनेछु र १०, १५ र २० वर्षसम्म गठबन्धनसँगै लानेछु ।’

कांग्रेस केन्द्रीय सदस्य टेकबहादुर गुरुङ र जितनारायण श्रेष्ठले प्रचण्डले फेरि धोका दिन सक्ने चिन्ता सभामा व्यक्त गरेका थिए । त्यसको जवाफ दिँदै प्रचण्डले भने, ’हँसिया हथौडामा मत नआएपछि वामपन्थी गठबन्धन बनाउन देउवाजीलाई जानकारी दिएरै म गएको थिएँ । म सुटुक्क गएको थिइँन ।’