आफ्नै क्षेत्रमा गोकुल बास्कोटा कमजोर, प्रभाव भएका एमाले नेताले छोडे साथ्

काठमाडौं- स्थानीय तहको निर्वाचनले देशभरको राजनीतिक माहोल तातिएको छ । दलहरूले चुनावी प्रचारको अभियानलाई तिब्र रूपले दौडाएका छन् । सत्ता गठबन्धनका पाँच दलले चुनावमा तालमेल गर्ने नगर्ने बिषयमा निर्णयमा नपुग्दा एमालेलाई थप सहज बनेको छ ।

चुनाव लक्षित कार्यक्रमहरू तिब्र बन्दै गर्दा जनमानसमा कुन पालिकामा कसले बाजी मार्ला भनेर हिसाबकिताब भइरहेका छन् । नेपाली कांग्रेस, नेकपा एकीकृत समाजवादी र नेकपा माआवादी केन्द्र लगायतका दल गठबन्धनमार्फत् चुनावी मैदानमा उत्रने तयारी गरिरहेका छन् भने एमालेले पनि साना दलहरूसँग तालमेल गर्नेगरी तयारी गरेको छ ।

प्रमुख प्रतिपक्षी दल नेकपा एमाले पनि राप्रपा नेपाललगायतका दलसँग तालमेल गरेर जाने भएको छ । केन्द्रीय तहबाट निर्णय भए पनि सत्तारूढ गठबन्धन दलबीच जिल्ला तथा पालिकाहरूमा भागवण्डा मिल्न नसक्दा केहि अन्योल बनेको छ ।

एमालेका पोलिटब्युरो सदस्य समेत रहेका पूर्वसञ्चारमन्त्री गोकुल बाँस्कोटाको क्षेत्रमा भने निर्वाचनको माहोल फेरिएको छ। काभ्रेको मण्डनदेउपुर नगरपालिका उनकै क्षेत्रमा पर्छ । एमालेका केही नेताहरू एकीकृत समाजवादीमा जाँदा बास्कोटालाई चुनावमा प्रतिकुल अवस्था व्यहोर्नुपर्ने अवस्था देखिएको छ ।

२०७४ सालको निर्वाचनमा मण्डनदेउपुरबाट ८ वडासहित प्रमुख र उपप्रमुखमा एमाले विजयी भएको थियो । एकातिर एकीकृत समाजवादीले पकड बढाउंदै जानु र एमाले विभाजन फाइदा उठाउँदै चुनाव जित्ने रणनीति कांग्रेसले बनाएको छ ।

मण्डनदेउपुर नगरपालिकामा तत्कालीन एमालेका उम्मेदवार टोकबहादुर वाइबा ७ हजार ६ सय ४६ मत ल्याएर मेयर पदमा निवार्चित भएका थिए । उनका निकटतम् प्रतिद्वन्द्वी नेपाली कांग्रेसका अच्युत पौडेलले ६ हजार ३ सय १३ मत ल्याएका थिए । दुई प्रतिष्पर्धीको बीचमा १३ सय ३३ मतान्तर थियो ।

उपमेयरमा एमालेकै निर्मला शाही ७ हजार ५ सय १ मत ल्याएर विजयी भएकी थिइन् भने उनकी निकटतम् प्रतिद्वन्द्वी कांग्रेसकी उम्मेदवार राधिका ढकालले ६ हजार १ सय ६० मत पाएकी थिइन् । उनीहरूबीच १३ सय ४१ को मतान्तर थियो ।

१२ मध्ये ८ वटा वडा जितेको एमालेसँग अहिले त्यो सामर्थ्य नरहे छैन । एमाले फुटेपछि बनेको नेकपा एसको बास्कोर्ताको क्षेत्रमा राम्रो पकड देखिएको छ। एमालेबाट चुनाव जितेका मेयर वाइबा नै एसका जिल्ला अध्यक्ष बनेका छन् भने प्रभाव भएका नेताहरूले एमाले छोडेका छन् ।

मेयरसहित ५ वडाध्यक्ष १ का लक्ष्मण बस्ताकोटी, ३ का बिलबहादुर तामाङ, ६ का डिल्ली आचार्य, ७ का नारायणप्रसाद लम्साल र ११ का माधव न्यौपाने एसमा छन् । एमालेमा भने उपमेयर निर्मला शाहीसँगै ३ जना वडाध्यक्ष छन् । जनप्रतिनिधिको बाहुल्यता एमालेभन्दा एकीकृत समाजवादीमै बढी देखिन्छ ।

बास्कोटाको पालिकामा एमाले कमजोर रहेका केही आधार छन् । तत्कालीन एमालेमा काभ्रेबाट प्रभावशाली देखिएका नेता अहिले एकीकृत समाजवादीमा छन् । २०६४ को संविधानसभा निर्वाचनमा तत्कालीन बागमती अञ्चलबाट एमालेलाइ निल हुनबाट जोगाएका नेता कृष्णप्रसाद सापकोटा पनि एकीकृत समाजवादीमा छन् ।

त्यतिबेला बागमती अञ्चलमा एमालेबाट निर्वाचित हुने उनी एक मात्र सांसद थिए । संविधानसभा सदस्य विदुर सापकोटा, बागमती प्रदेश सांसद लक्ष्मण लम्साल पनि एकीकृत समाजवादीमै छन् ।

केन्द्रबाट गठबन्धनको तयारी भए पनि मण्डनदेउपुरमा भने कांग्रेस नेताहरू दुई पक्षमा विभाजित छन् । आइतबार बसेको चार दलीय गठबन्धन बैठकले टुंगो लगाउन नसकेपछि उनीहरूले निर्णयका लागि प्रदेशमा पठाएका छन् ।

एमाले विभाजनको फाइदा कांग्रेसले उठाउने स्थानीय नेताहरूको दाबी छ । नगरमा नेकपा एसले पाँच वडासहित मेयरमा दाबी गरिरहेको छ । चार वडामा माओवादीको दाबी छ ।

नगरमा २८ हजार ५ सय ११ मतदाता छन् । त्यसमध्ये ६ हजारभन्दा बढी भोट समाजवादी एक्लैले ल्याउन सक्ने दाबी स्थानीय नेताहरूको छ । तर, एक्लै उठ्ने आँट भने उनीहरूमा छैन । गठबन्धन हुँदा पनि मेयरमा पाउनुपर्ने आधार समाजवादीसँग रहेको बताइन्छ ।

माओवादी केन्द्र भने एक्लै उठेर जित्ने स्थितिमा देखिँदैन । वडा नम्बर ४, ६ र ८ जित्ने स्थितिमा रहेको बताइन्छ । कांग्रेसमा गठबन्धनमार्फत् चुनावमा जाने कि एक्लै भन्ने कुरामा दुई मत छ । सभापति शेरबहादुर देउवा समूह गठबन्धनमार्फत् जाने पक्षमा छ भने शेखर कोइराला समूह एक्लै लड्नुपर्ने अडानमा छ ।

काभ्रेमा कांग्रेस सभापति तीर्थ लामा देउवा गुटका हुन् । देउवा पक्ष काभ्रेमा १३ पालिकामध्ये सातवटा आफूले लिएर बाँकी माओवादी र समाजवादीलाई दिऊँ भन्ने पक्षमा छ । तर कोइराला पक्ष चारवटा दुई पार्टीलाई दिएर ९ पालिका आफूले लिने पक्षमा छ । त्यही विवादले सहमति जुट्न सकेको छैन ।

चुनावी मैदानमा एमाले भने एक्लै भिड्ने तरखरमा छ । एमालेका स्थानीय नेता पार्टी विभाजन भए पनि कमजोर नभएको दाबी गरेपनि एमाले निकै कमजोर अवस्थामा पुगेको बताइन्छ ।