एमालेको निर्वाचन तयारी: सातै प्रदेशमा प्रशिक्षण, कहाँ कहिले ? यस्तो छ विवरण

काठमाडौँ- नेकपा (एमाले)ले स्थानीय तह निर्वाचनको तयारी थालेको छ । पार्टीका महासचिव शंकर पोखरेलले मंगलबारमात्रै निर्वाचनमा केन्द्रित हुन भन्दै प्रदेश कमिटीहरूका नाममा पत्र जारी गरेका छन् ।

पत्रमा जनाइए अनुसार निर्वाचन केन्द्रित सातवटै प्रदेशमा दुई दिने प्रशिक्षण तथा अभिमुखीकरण कार्यक्रम गर्ने बताइएको छ । महासचिव पोखरेलले प्रदेश कमिटीहरूका नाममा पत्र जारी गर्दै आवश्यक तयारीमा लाग्न निर्देशन दिएका छन् ।

पत्रमा महासचिव पोखरेलले पार्टीको लगातारको दबाब, निर्वाचन आयोगको ताकेता, जनस्तरबाट व्यक्त खबरदारी समेतका कारण सरकारले आगामी २०७९ वैशाख ३० गते स्थानीय तहको निर्वाचन एकै चरणमा गर्ने गरी निर्णय गरेकाले उक्त निर्वाचनलाई पार्टीका पक्षमा पार्न मातहत कमिटी, नेता तथा कार्यकर्तालाई तयारी हालतमा राख्नका लागि कार्यक्रम आयोजना गरिएको जनाएका छन् ।

निर्वाचन केन्द्रित दुई दिने कार्यक्रमको उद्घाटन अध्यक्ष केपी शर्मा ओलीले भर्चुअल माध्यमबाट माघ २८ गते गर्ने बताइएको छ । उद्घाटन सत्रमा पार्टी केन्द्रीय कमिटीका पदाधिकारी र सदस्यहरु, प्रदेश कमिटीका पदाधिकारी तथा जिल्ला कमिटीका पदाधिकारी एवं प्रशिक्षणमा सहभागी प्रशिक्षार्थीहरु सहभागी हुनेछन् ।

प्रशिक्षणका विषयहरु

–दसौं राष्ट्रिय महाधिवेशन/विधान महाधिवेशनबाट पारित सिद्धान्त, कार्यक्रम र कार्यदिशा ।

–सबल, गतिशील र अनुशासित पार्टी निर्माणः राजनीतिक, सङ्गठनात्मक र शैलीगत विषयहरु ।

– स्थानीय तहमा हाम्रा पाँच वर्षः उपलब्धी र अनुभवहरु

–स्थानीय तह निर्वाचनको तयारीः राजनीतिक, कानुनी र व्यवहारिक पक्षहरु ।

को को सहभागी ?

–प्रदेश कमिटीका इञ्चार्ज तथा सह इञ्चार्जहरु

–प्रदेश कमिटी पदाधिकारीहरु

–प्रदेश कमिटीका स्कुल तथा स्थानीय तह विभाग प्रमुखहरु

–प्रदेश अन्तर्गतका सबै जिल्ला कमिटी इञ्चार्ज÷सहइन्चार्जहरु

–प्रशेद अन्तर्गतका सबै जिल्ला कमिटी पदाधिकारीहरु

–सबै जिल्ला कमिटी स्कुल तथा स्थानीय तह विभागका प्रमुखहरु

–नेकपा (एमाले)बाट निर्वाचित जि.स.स. प्रमुख वा प्रमुख नभएको जिल्लाबाट उपप्रमुख ।

–नेकपा (एमाले)बाट विजयी पालिका प्रमुख वा पालिका प्रमुख नभएकोमा उपप्रमुखहरु

–पालिका पार्टी कमिटीका अध्यक्षहरु

प्रशिक्षणको समय तालिका र स्थान

प्रदेश नं १– फागुन १– २, विराटनगर

मधेस प्रदेश– फागुन ३–४, जनकपुर

वागमती प्रदेश– फागुन ६–७, काठमाडौं

गण्डकी प्रदेश– फागुन ८–९, पोखरा

लुम्बिनी प्रदेश– फागुन ११–१२, बुटवल÷दाङ

कर्णाली प्रदेश– फागुन १४–१५, सुर्खेत

सुदूरपश्चिम प्रदेश– फागुन १६–१७, धनगढी