बैठकमै ओलीमाथि खनिए भीम रावल
काठमाडौँ- नेकपा एमालेका अध्यक्ष केपी शर्मा ओलीलाई पार्टीकै नेताले असमानता गर्न खोजेको आरोप लगाएका छन् । शुक्रबार च्यासलमा बस्न लागेको केन्द्रीय कमिटीको बैठकको सुरुमै उनीमाथि असमानता गर्न खोजेको आरोप लागेको हो ।
नेता भीम रावलले ओलीले असमानताको स्थिति पैदा गर्न लागेको बताएका थिए । ‘एकताको जगलाई कमजोर बनाउँदै असमान स्थिति पार्टीभित्र किन पैदा हुन खोज्दैछ ?’ रावलको प्रश्न थियो ।
त्यस्तै भीम रावल निकटका नेता झपट रावलले पनि १०बुँदे सहमति कार्यान्वयन नगरेर अध्यक्ष केपी ओलीले पार्टीभित्र असमानताको स्थिति पैदा गरेको आरोप लगाए ।
आजको केन्द्रीय कमिटीको बैठकमा आसन्न विधान महाधिवेशनमा पेश गर्ने राजनीतिक र सांगठनिक प्रतिवेदन तथा विधान संशोधनको प्रस्तावमाथि छलफल हुने बताइएको छ ।
बैठकमा असोज १५, १६ र १७ गते हुन गइरहेको विधान महाधिवेशनका लागि राजनीतिक प्रस्ताव, सांगठनिक प्रस्ताव र विधान संशोधनसम्बन्धी प्रस्तावमाथि छलफल हुने भएको छ ।
यस्तै बैठकमा विधान महाधिवेशनमा प्रस्तुत गरिने प्रतिवेदनहरूमाथि छलफल हुने जनाइएको छ। बैठक दुई दिनसम्म चल्नेछ ।