भीम रावलले भने: ओलीकै कारण एकताको वातावरण खल्बलियो

काठमाडौँ- नेकपा (एमाले) उपाध्यक्ष भीम रावलले अध्यक्ष केपी शर्मा ओलीकै कारण एकताको वातावरण बिग्रेको बताएका छन् ।

उनले ओलीका पछिल्ला अभिव्यक्तिले पार्टी एकताको वातावरण खल्बलिएको बताएका छन् । बिहीबार वरिष्ठ नेता माधवकुमार नेपाल पक्षको केन्द्रीय सदस्यहरुको बैठकमा बोल्दै उपाध्यक्ष रावलले ओलीका अभिव्यक्तिले पार्टी एकता खल्बल्याएको बताएका हुन् ।

रावलको भनाइ उद्दधृत गर्दै नेपाल समूहका एक नेताले भने, ‘केपी ओलीका पछिल्ला अभिव्यक्तिले एकताको वातावरण खल्बल्याएको छ । हामीले एकताको प्रयास जारी गर्नुपर्छ ।’

भेलामा रावलले कार्यदलमार्फत भएका कामहरुको सबै वरिष्ठ नेता माधवकुमार नेपालसँगको सहमति र निर्देशनमा गरेको बताएका थिए ।

यसअघि नेपाल समूह छोडेर ओलीसँग लागेको आरोप लागेका रावल नेपाल समुहको बैठकमा सहभागी हुनुलाई अर्थपूर्ण मानिएको छ ।