एमसीसीबारे भीम रावलले दिए सरकारलाई चेतावनी
काठमाडौ- नेकपा एमालेका उपाध्यक्ष भीम रावलले अमेरिकी सहयोग सम्झौंता (एमसीसी) जस्ताको तस्तै पारित नगर्न सरकारलाई सचेत गराएका छन् ।
यसअघि पनि एमसीसीको विरोध गरिरहेका रावलले एमसीसीले राखेका सम्झौंता जस्ताको तस्तै पारित गरिए त्यो राष्ट्रघाती हुने जिकीर गरेका छन् ।
प्रधानमन्त्री शेरबहादुर देउवा नेतृत्वमा बुधबार बसेको पाँच दलीय गठबन्धनका नेताहरुको बैठकमा एमसीसी पारित गर्नेबारेमा छलफल भएको खबर सार्वजनिक भएलगत्तै नेता रावलले यस्तो खबरदारी गरेका हुन् ।
शुरुदेखि नै एमसीसी परियोजनाको विपक्षमा मत जाहेर गरिरहेका रावलले बुधबार एक ट्वीट गर्दै नेपालको संविधान र कानुन विपरितका प्रबन्ध हटाउन माग पनि गरेका छन् ।
रावलले लेखेका छन्, ‘नेपालको संविधान, कानून, राष्ट्रिय हित र स्वाधीनता विपरीतका प्रावधान नहटाई एमसीसीसँगको सम्झौता अनुमोदन गर्नु राष्ट्रघाती काम हुनेछ ।’
रावलले यस बदमले देश उपनिवेश बन्नेसमेत दलील गर्दै अगाडी लेखेका छन् , ‘देश उपनिवेशकरणतर्फ धकेलिनेछ । यस्तो काम सरकार र पार्टीले नगरून् । यसबारे प्रतिनिधि सभा पुनःस्थापनाका लागि भएको गठबन्धनमा पनि कुनै कुरा नभएको हेक्का रहोस् ।’