युवतीको रहस्यमय मृत्यु

अछाम । अछामको पञ्चदेवल विनायक नगरपालिका – ९ कालेकाँडाको भानाकोटकी उर्मीला टमटाको रहस्यमय मृत्यु भएको छ ।

मृतकको शव स्थानीय तिलक बटालाको घरभित्र फेला परेको थियो । अनुसन्धानका लागि घरमुली बटालालाई पक्राउ गरिएको जिल्ला प्रहरी कार्यालय अछामका प्रमुख डीएसपी दधिराम न्यौपानेले बताए । उनका अनुसार १६ वैशाखदेखि वेपत्ता २० बर्षीया उर्मीलाको शव १८ गते वटालाको घरभित्र फेला परेको थियो ।

उर्मीला मृत भेटिएको भन्दै उनै वटालाले गाउँमा खबर गरेपछि घटना सार्वजनिक भएको हो । वटालाले बलात्कारपछि हत्या गरेको हुनसक्ने स्थानीयले आशंका गरेका छन् । यद्यपी, घटनाको प्रारम्भीक अनुसन्धान सुरु गरिएकाले अहिले नै यसबारे कुनै ठोस प्रमाण फेला नपरेको डीएसपी न्यौपानेले बताए ।

‘हत्या हो कि होइन् यसै भन्न सकिन्न्, उनले भने,‘अनुसन्धान जारी छ । मेडिकल रिपोर्ट पनि आउँदैछ । छिट्टै यसको तथ्य आइहाल्छ ।’ मृतक उर्मीलाको शवसँगै मुसा मार्ने विषादी समेत भेटिएको उनले बताए । अनुसन्धानका लागि घटनास्थल पुगेका प्रहरी निरीक्षक वकिल बहादुर सिंहका अनुसार घटना रहस्यमय छ । ‘बटालाले आफ्नै घरमा शव भेटिएको खबर गरे’, उनले भने,‘यसले शंका उव्जाएको छ । अनुसन्धानपछि सबै खुल्ने छ ।’

मृतकको बुधबार जिल्ला अस्पताल मंगलसैनमा पोस्टमार्टम गरिएको थियो । परीक्षणका लागि शवका केही नमुना विधिबिज्ञान प्रयोगशाला काठमाडौं पठाउने तयारी भइरहेको प्रहरीले जानकारी दिएको छ । मंगलवार राती पक्राउ परेका बटाला हाल प्रहरी हिरासतमा छन् ।- नयाँ पत्रीका /फाइल तस्बिर :