जब उत्तर कोरियका सुरक्षाकर्मीले ह्वाइटहाउसकी प्रेस सेक्रेटरीलाई रोके
एजेन्सी– अमेरिकी राष्ट्रपति डोनाल्ड ट्रम्प आइतबार असैन्य क्षेत्रमा उत्तर कोरियाली नेता किम जोन उनसँग भेटवार्ताका लागि पुगे । त्यसक्रममा ट्रम्पले उत्तर कोरियाली जमिनमा पाइला राखे ।
जब ट्रम्प र किम जोन उनका बीच भेटवार्ता भइरहेको थियो त्यतिबेला किम जोन उनका सुरक्षाकर्मीले ह्वाइट हाउसकी प्रेस सेक्रेटरीसँग नराम्रो व्यवहार गरे ।
अमेरिकी समाचार संस्था फक्स न्यूजका अनुसार डोनाड ट्रम्प र किमबीचको भेटघाटका बीच कोरियाली सुरक्षा गार्डले ह्वाइट हाउसकी प्रेस सेक्रेटरी स्टेफनी ग्रिशमसँग ठेलमठेल र अभद्र व्यवहार गरेका थिए ।
उत्तर कोरियाली सुरक्षागार्ड अमेरिकाका पत्रकारलाई भित्र जानबाट रोकिरहेका थिए त्यतिबेला ह्वाइट हाउसकी प्रेस सेक्रेटरी स्टेफनी ग्रिशम उनीहरुसँग भिडेकी हुन् । यो भिडियोलाई अमेरिकी सञ्चारमाध्यमहरुले प्राथमिकताका साथ प्रसारण गरेका छन् ।
आइतबार अमेरिकी राष्ट्रपति ट्रम्प उत्तर र दक्षिण कोरियाको सीमा क्षेत्रमा पुगेका थिए । असैन्यकृत क्षेत्रमा पुगेका ट्रम्पलाई उत्तर कोरियाका शासक किम जोन उनले स्वागत गरेका थिए ।
सीमा क्षेत्रमा केहीबेर हस्तमिलान गरेपछि ट्रम्प पान्जोमुन पुगेका थिए । ट्रम्प उत्तर कोरिया पुग्ने पहिलो अमेरिकी राष्ट्रपति समेत बनेका छन् ।
किमसँग भेटवार्ता भएपछि ट्रम्पले उत्तर कोरियामा पाइला टेक्न पाउँदा गर्व महशुस भएको बताएका थिए भने उत्तरकोरियाली शासक किमले ट्रम्पको यो भ्रमणले आफू र उनीबीचको सम्बन्ध राम्रो रहेको स्पष्ट भएको बताएका थिए ।